Պաշտպանության նախարարության մամուլի խոսնակ Արծրուն հովհաննիսյանը արձագանքել է Հելսինկյան քաղաքացիական ասամբլեայի Վանաձորի գրասենյակի հրապարակմանը, որտեղ անդրադարձ էր կատարվել ԶՈՒ այնպիսի կորուստներին, որոնք ՊՆ-ն չի հրապարակել:
Արծրուն Հովհաննիսյանի արձագանքը ներկայացնում ենք ստերև.
«Սաքունցի ղեկավարած ՀՔԱՎ գրասենյակը երկու օր առաջ տարածեց 2016թ. ՀՀ ԶՈՒ ունեցած կորուստների վերաբերյալ տեղեկանք: Հեղինակները, հայտարարում են, որ իրենց կողմից իրականացված հետաքննության արդյունքում կարողացել են բացահայտել Զինված ուժերում գրանցված մահվան այնպիսի դեպքեր, որոնք Պաշտպանության նախարարությունը իբր թե փորձել է թաքցնել:
Մենք մի քանի անգամ պարոն Սաքունցին և իր ղեկավարած գրասենյակին հիմնավորել ենք, որ նման սիրողական ուսումնասիրություններով չի կարելի մանիպուլյացիայի ենթարկել մարդկանց և այդքան թեթև վերաբերվել ազգային անվտանգության խնդիրներին: Իրականում այս զեկույցը հերթական կողմնակալ, ոչ պրոֆեսիոնալ և անփույթ աշխատանքն է, մեղմ ասած: Կան բազմաթիվ վրիպումներ: Ինքներդ մտածեք, որտեղ է տրամաբանությունը, երբ պաշտպանական գերատեսչությունը ողջ տարվա ընթացքում հայտնում է բոլոր 162 մահվան դեպքերը՝ նշելով պատճառները և չգիտես ինչու, ըստ Սաքունցի, թաքցնում է 13 դեպք: Երբ լիներ հակառակը դա կունենար որոշակի տրամաբանություն, բայց ասել 162-ը և թաքցնել 13-ը, անխոս, դուրս է տրամաբանության բոլոր օրինաչափություններից: Հետաքննողները կարող էին մի քիչ ավելի խորամուխ լինել և պարզել, որ եթե այդ անուններից որևէ մեկը իրականում թաքրած լիներ, ապա կհայտնվեին հարազատներ, որոնք կբողոքեին նման անարդարության դեմ: Կամ եթե նրանք հայտնաբերել են այդ դեպքերը ապա ինչու այդ անձանց հարազատների չեն գտնում, չեն ճշտում այդ մարդկանց մահը թաքցնելու հանգամանքները:
Այդ գրասենյակը հարազատների հետ նման աշխատանքի լավ վարպետ է: Իբր բացահայտած դեպքերից որոշ դեպքերում խոսքը նախկին զինծառայողների մասին է, որոշ դեպքեր տեղի են ունեցել ծառայության հետ կապ չունեցող վայրերում կամ ծառայության մեջ չգտնվելու ժամանակ: Կան դեպքեր, երբ զինծառայողը մահացել է երկարամյա հիվանդության պատճառով: Նման պարագաներում, որևէ պարտավարություն չկա մահվան լուրը հայտնելու մասին, առավել ևս որ նշված դեպքերում նաև շատ հարազատներ խուսափում են դրանից: Մի բան հստակ է՝ այս հերթական տեղեկանքը ոչնչով չի տարբերվում նրանց նախկին աշխատանքներից. նույնքան սին և չհիմնավորված է: Պարզապես, ցավալի է այն, որ նրանք շահարկում են անդառնալի կորուստ ունեցած մարդկանց զգացմունքները:
