«Ազատ դեմոկրատներ» կուսակցության փոխնախագահ Անուշ Սեդրակյանը զարմանալի որակեց այն փաստը, որ Վարդան Սեդրակյանին առանց ապացույցների տասնչորս տարվա ազատազրկման են դատապարտում: Նա նման տեսակետ հայտնեց այսօր տեղի ունեցած մամուլի ասուլիսի ժամանակ:
«Պարույր Հայրիկյանի վրա կատարված մահափորձի գործը մութ քաղաքական գործ է, բայց միևնույն է, առանց հիմքերի մարդուն այդքան տարվա ազատազարկման դատապարտելը չգիտեմ որքանով է ճիշտ»,- ասաց նա` կես կատակ-կես լուրջ հավելելով, որ իր ազգանունն էլ Սեդրակյան է, և ինքը մտավախություն ունի, որ ազատազրկումների ալիքն իր վրա էլ կտարածվի:
Ասուլիսի մյուս բանախոս, ՀՀԿ-ական պատգամավոր Արտակ Դավթյանն էլ կատակով հավելեց, որ պատգամավոր Մհեր Սեդրակյանն էլ է Սեդրակյան: «Ձեր մտավախությունները ցրում եմ: Ինչ վերաբերում է գործին, ապա ի գիտություն եմ ընդունել Վարդան Սեդրակյանի վերաբերյալ դատավճիռը: Սպասենք Վերաքննիչի որոշմանը»:
Լուսանկարը՝ PanARMENIAN Photo-ի
