ԱՄՆ նախագահ Բարաք Օբաման Իրանի միջուկային ծրագրի հարցը դիվանագիտական ճանապարհով լուծելու պատրաստակամություն է հայտնել: Այս մասին հաղորդում է Reuters-ը:
«Մեր ճանապարհին շատ խոչընդոտներ կան, սական ես հավատում եմ այդ հարցի դիվանագիտական լուծմանը»,- ասել է Օբաման՝ երեքշաբթի օրը ելույթ ունենալով ՄԱԿ-ի Գլխավոր ասամբլեայի անդամների առջև: Նա ընդգծել է, որ ԱՄՆ-ը ողջունում է Իրանի նոր նախագահ Հասան Ռուհանիի ընտրած քաղաքական ուղին և նրանից «վճռական ու թափանցիկ գործողություններ է սպասում»:
Իրանի միջուկային ծրագրի լուծման հարցն Օբաման վստահել է ԱՄՆ պետքարտուղար Ջոն Քերիին: «Ես Ջոն Քերիին կարգադրել եմ շարունակել աշխատանքներն Իրանի կառավարության հետ՝ սերտորեն համագործակցելով Եվրամիության, Մեծ Բրիտանիայի, Ֆրանսիայի, Գերմանիայի, Ռուսաստանի և Չինաստանի հետ»,- նշել է Օբաման:
