Սեպտեմբերի 23-ին` ժամը 17.30-ի սահմաններում, Վանաձոր քաղաքի Բանյոյի փողոցի 4-րդ շենքի 3-րդ բնակարանի լոգարանում կախվելու միջոցով ինքնասպանություն գործած 36-ամյա Դավիթ Մայիլյանը ոստիկանության մայոր էր և աշխատում էր ոստիկանության Լոռու մարզային վարչությունում որպես փորձագետ: Ամուսնացած էր, ուներ երկու երեխա: Կինը նույնպես իրավապահ համակարգից է, նա էլ ոստիկանության Վանաձորի բաժնում է աշխատում:
Ցավակցելու նպատակով նրանց բնակարան այցելած լրագրողներին նա հենց սկզբից դիմավորեց «Սխալ ժամանակ եք ընտրել այստեղ գալու համար» նախադասությամբ:
Թե ինչն է եղել երիտասարդ ոստիկանի` այս քայլին դիմելու պատճառը, ստույգ հայտնի չէ. ըստ քաղաքում շրջանառվող խոսակցությունների՝ Դավիթ Մայիլյանը խոշոր պարտքեր է ունեցել:
Ի դեպ, համակարգի աշխատողներից հաճախ կարելի է դժգոհություններ լսել իրենց աշխատավարձի և սոցիալական պայմանների վերաբերյալ: Մինչդեռ բոլորովին վերջերս Վանաձոր այցելած Վլադիմիր Գասպարյանը, ոստիկանության Բազումի բաժնի շենքի բացման արարողության ժամանակ անդրադառնալով ոստիկանների աշխատավարձի բարձրացման հարցին, կարծիք է հայտնել, որ դրա կարիքն առայժմ չկա: «Անկեղծ ասած` ես չեմ գտնում, որ մեր աշխատավարձերը հիմա պետք է բարձրանան: Մենք ավելի շատ խնդիրներ ունենք, մենք բանակում լիքը խնդիրներ ունենք»,- ասել է ոստիկանապետը:
