ԱՄՆ նախագահ Բարաք Օբաման Նայրոբիի ահաբեկչությունն անվանել է բռնության սարսափելի ակտ և հայտարարել, որ ԱՄՆ-ը հնարավոր աջակցություն է ցուցաբերում Քենիային: Այս մասին հաղորդում է Associated Press-ը: Նման հայտարարությամբ նա հանդես է եկել Նյու Յորքում Նիգերիայի նախագահ Գուդլաք Ջոնաթանի հետ հանդիպմանը:
Նախագահները, որոնք Նյու Յորք են ժամանել ՄԱԿ-ի Գլխավոր ասամբլեայի նիստին մասնակցելու, իրենց ցավակցությունն են հայտնել Քենիայի նախագահ Ուհուրու Քենյաթային:
«Ես զգում եմ նախագահ Քենյաթայի ցավը, մեզ բոլորիս համար ահաբեկչությունն ահաբեկչություն է՝ անկախ վայրից»,- ասել է Նիգերիայի նախագահը:
Հիշեցնենք, որ Քենիայի մայրաքաղաք Նայրոբիում «Ալ-Շաբաբ» իսլամիստական խմբավորման գրոհայինները հարձակվել էին առևտրի կենտրոնի վրա, որի հետևանքով զոհվել է առնվազն 62 մարդ:
