Մեքսիկական «Ծոցի կարտել» հանցավոր կազմակերպությունը որոշել է օգնել Տամաուլիպաս նահանգի «Ինգրիդ» փոթորկից տուժածներին՝ նրանց հասցնելով սննդամթերք:
«Ինգրիդ» և «Մանուել» տարերային աղետները Մեքսիկային հարվածել են միանգամից 2 կողմից՝ Ատլանտյան և Խաղաղ օվկիանոսներից: Զոհերի թիվը գերազանցում է 100-ը և կարող է ավելանալ: Լուրջ վնաս է հասցվել մոտ 240 հազար մարդու ունեցվածքին, աղետից տուժել է 1.2 մլն մարդ:
Կիրակի օրը կարտելը սոցցանցերում տեսագրություն է տեղադրել, որում երևում է, թե ինչպես են թմրավաճառները օգնություն տանում տուժած շրջաններ, հետո այն բաժանում բնակիչներին: Հանցագործների նախաձեռնությանը տուժողները մեծ ուրախությամբ են արձագանքել:
Տեսագրություններում նաև հարցեր են ուղղվում քաղաքական գործիչներին և իշխանություններին, որոնց, հանցախմբի կարծիքով, չեն հետաքրքրում աղքատ մարդիկ: Հանցագործները վստահեցնում են, որ դա անում են ի սրտե՝ առանց հետապնդելու որևէ շահ: Այս մասին հաղորդում է Ria Novosti-ն:
