Մայրաքաղաքում տրանսպորտի ուղեվարձի թանկացման դեմ պայքարին պատրաստ են նաև հայ անվանիները: «Առաջին լրատվական»-ի հետ զրույցում դերասանուհի Լալա Մնացականյանը հայտնեց, որ անպայման միանալու է թանկացման դեմ պայքարի դուրս եկողներին: «Եթե սկսել եմ պայքարել, ապա իմ պայքարից հետ չեմ կանգնելու»,- ասաց նա: Երգչուհի Արմինկան ևս նշեց, որ ի սկզբանե եղել է պայքարում և իր սկզբունքներին հավատարիմ է մնալո: «Եթե լինելու է պայքար, ես ևս լինելու եմ պայքարում: Ժողովուրդն ի վիճակի չէ, ժողովրդի վիճակն օրեցօր է վատանում, դա ակնհայտ է բոլորի համար, ես ընդամենը իմ քաղաքացիական պարտքն եմ համարում, լինելով ժողովրդի մի մասը, լինել ժողովրդի կողքին»,- ասաց նա:
Երգահան Գիսանե Պալյանին նույնպես վրդովեցրել են ուղեվարձի թանկացման մասին լուրերը: Գիսանեն ևս բողոքի իր ձայնը կարտահայտի` միանալով մյուս պայքարողներին: Կարգին Մկոն դժվարացավ նշել` կմասնակցի պայքարին, թե ոչ: «Եթե որոշեմ մասնակցել, կմասնակցեմ, պատրաստ չեմ այդ հարցին պատասխանել»,- ասաց նա` միաժամանակ նշելով, որ դեմ է ուղեվարձի թանկացմանը: «Շատ վատ է, որ այդպես են ուզում անել: Առայժմ այդքանը կարող եմ ասել: Շատ սխալ են անում, ես համաձայն չեմ դրա հետ»,- ասաց նա:
Մայրաքաղաքում տրանսպորտի ուղեվարձի թանկացման հարցը կրկին օրակարգում է: Քաղաքապետարանը պատրաստվում է քննարկումներ կազմակերպել հարցի շուրջ: Ըստ շրջանառվող վարկածների` ուղեվարձը թանկանալու է` հասնելով 200-250 դրամի: «Վճարում ենք 100 դրամ» նախաձեռնող խումբը շարունակելու է պայքարել տրանսպորտի ուղեվարձի թանկացման դեմ, վերջիններս պայքարի հին մեխանիզմներին կգումարեն նորերը, որոնց մասին առայժմ չեն բարձրաձայնում: Երևանի ավագանու ԲՀԿ և «Բարև, Երևան» խմբակցություններն արդեն հայտարարել են, որ չեն մասնակցելու տրանսպորտի սակագնի բարձրացումը քննարկող հանձնաժողովի աշխատանքներին:
