Հայաստանի անկախության 22-րդ տարեդարձի կապակցությամբ այսօր Ազատության հրապարակից մեկնարկեց համազգային բողոքի երթ՝ գործող նախագահ Սերժ Սարգսյանի հրաժարականի պահանջով:
Երթին մասնակցում էր նաև ՌԱՀՀԿ փորձագետ Էդգար Վարդանյանը, որի խոսքով՝ ոչ լեգիտիմ իշխանությունների առկայությունը արդեն իսկ մեծ հարված է անկախությանը: «Այնպիսի պետություններ, որոնք շատ երկար ժամանակահատվածում չեն կարողանում թոթափել բռնապետերին, ոչ լեգիտիմ իշխանություններին, այդպիսի պետությունները միշտ վտանգի տակ են՝ անկախության կորստի իմաստով»,- «Առաջին լրատվական»-ի հետ զրույցում ասաց նա:
Է.Վարդանյանի խոսքով՝ արտաքին քաղաքականության հետ կապված՝ իշխանություններն անում են չտրամաբանված, հասարակության կարծիքը հաշվի չառնող քայլեր, որոշումներ․ «Վերջին առիթը հենց Սերժ Սարգսյանի հայտարարությունն էր Մաքսային միություն մտնելու ցանկության մասին… Բնականաբար, այս ամենը պետք է որ բողոք առաջացներ, և որոշ չափով այդ բողոքն արդեն իսկ առաջացել է: Այսպիսի միջոցառումները, կարծում եմ, ինչ-որ տեղ պայքարի նոր փուլի սկիզբ է»:
Հարցին, հնարավո՞ր է քաղաքացիական հասարակության և
քաղաքական ուժերի, կուսակցությունների միավորում, Էդգար Վարդանյանը պատասխանեց․ «Նոր ձևաչափ պետք է ձևավորվի, որը կլինի վերկուսակցական և վերքաղաքացիական , այսինքն՝ այպիսի մի ձևաչափ, որտեղ և՛ կուսակցականները, և՛ քաղաքացիական ակտիվիստները, և՛ հասարակ քաղաքացիները հավասար սկզբունքով կմիավորվեն, և ինչ-որ կոլեգիալ մարմիններ կստեղծվեն, որը կկոորդինացնի ընդհանուր հասարակության բողոքը… Այս ամենի արդյունքում կարող է նման բան ստեղծվել, ես այսօր տեսնում եմ դրա նախադրյալները»:
Փորձագետի դիտարկմամբ՝ բողոքը պետք է լինի կշռադատաված, հավասարակշռված, որպեսզի տևական լինի․ «Նոր ձևաչափի անհրաժեշտությունը կա, եթե այդ ձևաչափը կայանա՝ բողոքն ավելի գրագետ կլինի:
Նույնիսկ նրանք, ովքեր մինչև վերջերս կարծում էին, որ այս իշխանությունների օրոք հնարավոր են դրական փոփոխություններ, նրանք էլ են արդեն եկել այն եզրակացության, որ հնարավոր չէ այս իշխանությունների օրոք հասնել լուրջ, դրական փոփոխությունների»:
Դիտե՛ք մեր տեսանյութը
