«Հայոց ցեղասպանության 100-րդ տարելիցին ընդառաջ» խորագրով հայկական հիմնախնդիրների իրազեկման կառույցների ներկայացուցիչների համահայկական համաժողովի մասնակիցները այսօր հանդիպեցին պաշտպանության նախարարությունում ՝ նախարար Սեյրան Օհանյանի և սփյուռքի նախարար Հրանուշ Հակոբյանի հետ:
Համաժողովի սկզբում տիկին Հակոբյանը ողջունեց ներկաներին, կարևորեց նման հանդիպումը պաշտպանության նախարարությունում, որից հետո խոսքը փոխանցեց Սեյրան Օհանյանին:
Պաշտպանության նախարարը իր խոսքում նշեց, որ մեր ժողովրդի պատմությունն այնպիսին է, որ մենք պարտավոր ենք անդրադարձ կատարել անցյալին, դասեր քաղել դրանից և ստանձնել միասնական լինելու պարտավորություն. «Ցեղասպանության խնդրի մասին երկար տարիներ լռել ենք, և միայն 1965-ին առաջին անգամ Ուրուգվայի կողմից դատապարտվեց այս ոճիրը: Դրանից շուրջ կես դար անց մենք հանդիպում ենք, երբ արդեն մոտենում ենք 100-ամյակին, և փորձում ենք այն մոտեցնել եզրագծին»:
Սեյրան Օհանյանի համոզմամբ՝ Ցեղասպանության ճանաչումը մեր բարոյական խնդիրները լուծելու համար է, որը թույլ կտա նաև ֆինանսական և նյութական փոխհատուցում. «Ճանաչումը նաև դատապարտման, երկրագնդի վրա նման ոճիրները կանխելու համար է: Այդ է պատճառը, որ 1988-ին մենք նորից զենք վերցրինք և հայ ժողովրդին պարտադրված պատերազմական իրավիճակից կարողացանք միահամուռ ուժերով, միասնական ձևով հաղթանակով դուրս գալ և թույլ չտալ, որ կրկնվի այն, ինչ եղավ 1915 թվականին»:
Նրա հավաստմամբ՝ շատ կարևոր է տարբեր երկրներում Ցեղասպանության ճանաչումը, և դա կլինի հայ ժողովրդի ու տարբեր կազմակերպությունների միահամուռ աշխատանքի շնորհիվ:
Դեռ Սեյրան Օհանյանը խոսքը չէր ավարտել, երբ հանդիպման համակարգողները լրագրողներին խնդրեցին լքել դահլիճը, քանի որ նպատակահարմար չէր մեր ներկայությունը հետագա քննարկումներին:
Ճանապարհին միջոցառման համակարգողների հետ զրույցի արդյունքում պարզ դարձավ, որ դա եղել է սփյուռքի նախարարության, մասնավորապես՝ Հրանուշ Հակոբյանի պահանջը: Թե ինչու Ցեղասպանության հետ կապված համաժողովին լրագրողները չկարողացան մինչև վերջ մասնակցել՝ բացի «մենք ինչ կարող ենք անել»-ից և ափսոսանք հայտնող հայացքներից, ոչ մի պատասխան չստացանք:
«Առաջին լրատվական»-ի հետ զրույցում պաշտպանության նախարարության մամուլի խոսնակ Արծրուն Հովհաննիսյանն ասաց, որ իրենց տասը րոպե առաջ են տեղեկացրել, որ լրագրողներին համաժողովի առաջին տասը րոպեից հետո խնդրել են հեռանալ դահլիճից: «Իհարկե, դրա մասին ավելի վաղ պետք էր ասել»,- նշեց նա:
Լուսանկարը` PanARMENIAN Photo-ի
