Հայաստանում տարվում է հետամնաց գիտական քաղաքականություն, ինչի մասին է վկայում օրհասական վիճակում գտնվող գիտահամալսարանական ոլորտը: Այսօր կայացած մամուլի ասուլիսի ժամանակ այս մասին ասաց կենսաֆիզիկոս, դոկտոր պրոֆեսոր Սիներիկ Հայրապետյանը՝ հավելելով, որ բաց նամակ է հղել Վերահսկիչ պալատին՝ ստուգելու պետության կողմից ոլորտին տրամադրված և ծախսված գումարների համապատասխանելիությունը:
«Մեր երկրում գիտությունը թելադրվում է ազգային սերուցք չհանդիսացող գիտական խորհրդի կողմից: Մինչդեռ եվրոպական երկրներում գիտատեխնիկական քաղաքականությունը որոշում են ոլորտի առաջատարները»,- ասաց նա:
Սիներիկ Հայրապետյանը հռետորական հարց հնչեցրեց՝ ո՞ւր են գնում գիտությանը տրամադրվող միլիարդավոր դրամները: «Այդ գումարները ռեստորաննե՞ր են գնում, թե՞ ուր: Գիտության վիճակը ցույց է տալիս, որ հայաստանյան իշխանությունները պետք է վերանայեն այդ ոլորտը, ստեղծվի հատուկ մարմին, որը կվերահսկի բնագավառին հատկացվող ֆինանսավորումները: Այլապես սա պետական մակարդակով խելագարություն է»,- ասաց դոկտոր պրոֆեսորը:
Նա անարդար համարեց, որ չի ընդգրկվել ԳԱԱ-ի ամենաարդյունավետ աշխատող գիտնականների այս տարվա ցուցակում: «Պատճառն այն է, որ մասնագետներն ընտրվում են խաբեբայությամբ, խմբակային կեղծ փորձագիտության արդյունքում: Այս անարդարությունից դրդված՝ հրաշալի շատ գիտնականներ, ընդ որում՝ երիտասարդ, հեռանում են երկրից:
Ես նախօրոք գիտեի, որ փորձագիտությանը ներկայացրած աշխատանքս մերժվելու է, սակայն մտածված կերպով եմ մասնակցել՝ բացահայտելու ոլորտում առկա կեղծիքները: Երկրում առկա մթնոլորտը կոռուպցածին է: Սրանում ոչ թե նախագահն է մեղավոր, այլ մորթապաշտ գիտնականները: Գիտության կոմիտեն գիտության դեմ է աշխատում»,- ասաց Սիներիկ Հայրապետյանը՝ հավելելով, որ մոտ ժամանակներս պատրաստվում է նույնաբովանդակ բաց նամակ հղել նաև երկրի ղեկավարին, վարչապետին և ԱԺ նախագահին:
