«Ողջունելով Հայաստանում ներքաղաքական խնդիրների կարգավորումը և ընդդիմություն-իշխանություն երկխոսությունը՝ միջազգային հանրությունը նպատակ է հետապնդում Հայաստանի իշխանություններին մղելու ԼՂ խնդրում ավելի որոշակի քայլեր իրականացնելուն»,- «Առաջին լրատվականի» հետ զրույցում կարծիք հայտնեց ՆԺԿ առաջնորդ, քաղաքագետ Արամ Կարապետյանը:
Նկատենք, որ միջազգային կառույցների կողմից բազմիցս է շեշտվել, որ քանի դեռ Հայաստանում և Ադրբեջանում ներքին խնդիրները հարթված չեն, կողմերը չեն կարողանա վճռական քայլերի գնալ ԼՂ հարցի կարգավորման հարցում: Այժմ ենթադրվում է, որ Հայաստանում եղած երկխոսությունը Սերժ Սարգսյանի համար բանակցային գործընթացում նման քայլերի գնալու հիմք է:
Արամ Կարապետյանը նկատեց, որ դա իրավամբ այդպես է, սակայն այս պահին հնարավոր չէ, քանզի Սերժ Սարգսյանը դեռ այնքան բարեփոխումների ծրագիր չի իրականացրել Հայաստանում, որ հայ ժողովուրդը միանշանակ ընկալի այն ամենը, ինչ անում է իշխանությունը ԼՂ-ի և հայ-թուրքական խնդրի առումով:
«Սերժ Սարգսյանը շատ լավ հասկանում է, որ միայն ՀԱԿ-ի հետ պայմանավորվելով՝ այդ խնդիրներն ինքը չի կարող լուծել, որովհետև ՀԱԿ-ը, լինելով ազդեցիկ ուժ, այդուամենայնիվ չի ներկայացնում ամբողջ հայության շահերը: Ավելին, որևէ մեկ ուժ՝ լինի դա իշխանություն, թե ընդդիմություն, պարզ է, որ չի կարող ներկայացնել հավաքական շահերը»:
Կարապետյանը նկատեց, որ հենց այս ամենն է պատճառը, որ ԼՂ հարցի կարգավորման գործընթացում փակուղային իրավիճակ է ստեղծվել սպասվելիք սցենարների «ռեժիսորների» համար: Նա նկատեց, որ նման իրավիճակ ստեղծվեց նաև հայ-թուրքական գործընթացի ժամանակ. «Հասկանալի է, որ հայ ժողովուրդն ուղղակիորեն պայմանավորվածությունների մեջ չի ընկալում նման գործողությունները: Եվ այժմ բոլորը կանգնած են ինչ անելու դիլեմայի առաջ»:
