Հայաստանի Հանրապետության և Իրանի Իսլամական Հանրապետության տնտեսական համագործակցության միջկառավարական հանձնաժողովի տասներորդ նիստի արդյունքներով, Թեհրանում մայիսի 30-ին ստորագրվել է երկկողմ փաստաթուղթ: Այս մասին հաղորդում է «Արմենպրես» լրատվական գործակալությունը։ Գազի, նավթի, ջրի, էլեկտրաէներգիայի, առևտրի, արդյունաբերության ոլորտներում համագործակցության հուշագիրը ստորագրել են հանձնաժողովի հայկական կողմի համանախագահ, ՀՀ էներգետիկայի և բնական պաշարների նախարար Արմեն Մովսիսյանը և ԻԻՀ արտաքին գործերի նախարար Ալի Աքբար Սալեհին:
ԻԻՀ ԱԳ նախարարն ընդգծել է երկկողմ, հատկապես տնտեսական ոլորտում համագործակցության շարունակման անհրաժեշտությունը: Հայաստանի և Իրանի միջև ապրանքաշրջանառությունը նախորդ տարի 2009 թ. նկատմամբ ավելացել է 38 տոկոսով՝ հասնելով 270 միլիոն դոլարի: Այդուհանդերձ, ըստ Ալի Աքբար Սալեհիի, առևտրի ներկա մակարդակը չի համապատասխանում ներուժին և կարողություններին, թեև «առկա են բոլոր հնարավորությունները ծավալը հասցնելու ընդունելի մակարդակի»: «Եթե նկատի ունենանք Հայաստանի յուրահատուկ դիրքը տարածաշրջանում՝ մի կողմից այն կարող է կապվել Սև ծովի հետ, մյուս կողմից՝ Պարսից ծոցի՝ Իրանի միջոցով, դա կարող է հանգեցնել դրական տնտեսական պտուղների երկու պետությունների և ողջ տարածաշրջանի համար»,-ասել է Իրանի ԱԳՆ-ն:
ՀՀ էներգետիկայի և բնական պաշարների նախարար Արմեն Մովսիսյանի խոսքերով՝ հայ-իրանական կապերը շատ բարձր մակարդակի են4 և համագործակցությունը տարբեր ոլորտներում կշարունակվի: «Երկու երկրները գերազանց քաղաքական կապեր ունեն»,- նշել է նախարարը:
Թեհրանում ունեցած հանդիպումներում քննարկվել է նաև Իրան-Հայաստան երկաթուղու կառուցման հնարավորությունը: ԻԻՀ ճանապարհների ու տրանսպորտի փոխնախարար Ռեզա Փիլփայեն հայտնել է իրանական կողմի պատրաստակամությունը կապալառու կազմակերպություններով ներգրավվել Ջուլֆայից (Իրան) Սիսիան (Հայաստան) երկաթգծի կառուցման գործում, որտեղ կպահանջվի 2.5 միլիարդ դոլարի ներդրում: Երկաթուղային ցանցh ունենալու է 540 կիլոմետր երկարություն, որից 480 կիլոմետրը` Հայաստանի, 60 կլիոմետրը` Իրանի տարածքում:
Իրանի էներգետիկայի նախարար Մեջիդ Նամջուի հետ հանդիպմանը նշվել է, որ Հայաստանի և Իրանի միջև էլեկտրահաղորդման երրորդ գծի շինարարությունը սկսվելու է առաջիկա երկու շաբաթվա ընթացքում: Առաջիկա օրերին հայկական կողմը քննարկումներ կունենա իրանական շինարարական կազմակերպության հետ: 800-900 մեգավատտ հզորությամբ էլեկտրահաղորդման գծի շինարարության նախագծի արժեքը գնահատվում է 110 մլն դոլար:
Կողմերը քննարկել են նաև Արաքս գետի վրա հէկի շինարարության հարցը: Մ.Նամջուի խոսքերով, հէկի շինարարությամբ զբաղվելու է իրանական կոնսորցիումը, նախագծի արժեքը գնահատվում է 400-500 մլն դոլար: