Եվրամիության ընդլայնման և եվրոպական հարևանության քաղաքականության հարցերով հանձնակատար Շտեֆան Ֆյուլեն Facebook-ի իր էջում կիսվել է Վրաստանի արդարադատության նախարար Տեա Ցուլուկիանիի հետ հանդիպման տպավորություններով: Այս մասին հաղորդում է Trend գործակալությունը՝ վկայակոչելով Վրաստանի արդարադատության նախարարությանը:
Ֆյուլեն գրել է, որ Վրաստանը Եվրամիության կարևոր գործընկերներից մեկն է: Նա ողջունել է ԵՄ-ի հետ հարաբերություններն ավելի խորացնելու Թբիլիսիի պատրաստակամությունը:
Եվրահանձնակատարը հայտարարել է, որ ԵՄ-ն աջակցում է Վրաստանի քաղաքական և տնտեսական ինտեգրմանը, ինչի մասին վկայում է Ասոցացման համաձայնագիրը ձևակերպելու ցանկությունը:
Հանդիպմանը Ցուլուկիանին և Ֆյուլեն քննարկել են նախատեսված և ընթացիկ իրավական բարեփոխումները, որոնց իրականացումը Վրաստանի արդարադատության նախարարության իրավասության ներքո է: Ֆյուլեի խոսքերով՝ մինչ համաձայնագրի վավերացումը շատ կարևոր է առավելագույն կառուցողական մթնոլորտի ստեղծումը բարեփոխումների համար:
Կողմերը քննարկել են նաև հոկտեմբերին կայանալիք նախագահական ընտրությունները: Հանդիպման վերջում Ֆյուլեն մեկ անգամ ևս նշել է Եվրամիության աջակցությունը՝ ուղղված Վրաստանի ամբողջականությանը և ինքնիշխանությանը: