«Առաջին լրատվական»-ը ՍԴՀԿ նոր ատենապետի և կուսակցությունում առկա տարաձայնությունների վերաբերյալ զրուցեց ՍԴՀԿ հայաստանյան վարչության ատենապետ Գևորգ Պերկուպերկյանի հետ:
Միևնույն ժամանակ տեղեկացնում ենք, որ ՀԱԿ խմբակցության պատգամավոր Լյուդմիլա Սարգսյանը վիճարկում է Պերկուպերկյանի՝ ատենապետ լինելու հանգամանքը՝ մասնավորապես նշելով, որ գործընթացն առայժմ դատական վիճարկման փուլում է, և ՍԴՀԿ ատենապետն ինքն է:
– Պարոն Պերկուպերկյան, այն բանից հետո, երբ ՍԴՀԿ համագումարում ատենապետ ընտրվեց Հակոբ Տիգրանյանը և ոչ Սեդրակ Աճեմյանը, մամուլում հրապարակումներ եղան այն մասին, որ ՍԴՀԿ-ում խմորումներ, տարաձայնություններ կան, այդպե՞ս է:
– Մենք այսօր հայտարարություն ենք տարածել. այն ինչ-որ անհատ չի կազմել, այլ վարչության կողմից է կազմվել՝ կարծում եմ այդտեղից պարզ է, որ խմորումներ չկան: Ինչ վերաբերում է Ձեր հարցին, ապա Սեդրակ Աճեմյանն ինքը հրաժարվեց` անձնական պատճառներից ելնելով, առողջական խնդիր ունի: Բայց նա վարչության կազմի մեջ է, նորից շարունակելու է գործունեությունը, այսինքն փոխատենապետ է ու կհամագործակցի ոնց որ միշտ:
– Այսինքն՝ հերքո՞ւմ եք, որ ՍԴՀԿ-ում խմորումներ կան:
– Ո՛չ, խմորումներ չկան, կան տարաձայնություններ որոշակի հարցերի շուրջ, ու եթե նմանատիպ բաներ չլինեն կուսակցության մեջ, նշանակում է կուսակցությունը մահացել է: Պետք է լինի ընդդիմախոս, լինեն բանավեճեր, տեսակետների բախումներ, որպեսզի ավելի լավը ընտրվի բանավեճերի ընթացքում։ Եթե չկա նման բան՝ դա է վատը:
– Իսկ հայաստանյան վարչության մասին ի՞նչ կասեք, գործունեության իմաստով որևէ ծրագրային կամ քաղաքական փոփոխություն կրելո՞ւ է, թե՞ ոչ: Միգուցե ավելի աշխուժանա հասարակական, քաղաքական կյանքում:
– Այո՛, պետք է աշխուժանա թե՛ հասարակական, թե՛ քաղաքական կյանքում: Ինչ վերաբերում է հայաստանյան վարչությանը, ապա մոտ երկու ամսից տեղի կունենա նոր համագումար, որովհետև ներկա վարչության պաշտոնավարման ժամկետը մինչև տարվա վերջ լրանում է: Հիմնականում ծրագրային հարցեր են քննարկվում՝ տարբեր կառույցների հետ համագործակցելու վերաբերյալ:
– Ենթադրվո՞ւմ է, որ համագումարի ժամանակ նոր ատենապետ է ընտրվելու:
– Դեռ ժամանակավորապես ատենապետ ես կմնամ, բայց նոր ատենապետ կլինի՝ ինձ թվում է:
– Այսինքն՝ չե՞ք շարունակի պաշտոնավարել, թե՞ ցանկություն չունեք:
– Չէ, քանի որ ես արդեն Կենտրոնի վարչության անդամների կազմում եմ, չեմ կարող միաժամանակ երկու պաշտոն զբաղեցնել: Ըստ կանոնադրության՝ եթե վարչության անդամ ես, ատենապետ չես կարող լինել:
– Հայաստանում կուսակցությունները կարծես թե բաժանվել են ընդդիմադիր, իշխանամետ և նաև «այլընտրանք» ունենք: Ձեր կուսակցությունն այժմ ունի՞ որևէ ուղղվածություն, թե՞ ոչ:
– Կմնանք ընդդիմադիր դաշտում, բայց ոչ թե իշխանամետ, այլ պետականամետ: Այսինքն, ոչ թե ուղղվելու ենք դեպի Արևմուտք կամ Ռուսաստան, այլ պետականամետ ենք լինելու: Համագումարի ժամանակ հստակ կորոշվեն մեր հետագա անելիքները: Բայց ընդդիմադիր դաշտում ենք մնալու, քանի որ իշխանության մեջ ներկայացված չենք:
– Ընդդիմադիր ուժերի կողմից տարատեսակ բողոքի ակցիաներ են կազմակերպվում: Այսպես ասած «փողոցային» պայքարին ՍԴՀԿ-ն մասնակցելո՞ւ է։
– Պաշտոնական հայտարարությունով մեր ուսանողական թևը կմասնակցի ուսանողական վարձերի հետ կապված ակցիաներին: Իսկ մնացած ակցիաներին կուսակցության անդամները մասնակցություն ունեն: Բայց մի բան, որ կազմակերպում է քաղաքացիական հասարակությունը, մեր դիրքորոշումը հետևյալն է՝ խրախուսել քաղաքացիական հասարակության ձևավորմանը և մասնակցություն ունենալ, այլ ոչ թե պոպուլիստական հայտարարություններ անել, որ կուսակցությունը միանում է նախաձեռնությանը:
– Չե՞ք կարծում, որ այն բանից հետո, երբ նախագահական ընտրությունների ժամանակ ՍԴՀԿ-ն հայտարարություն տարածեց Սերժ Սարգսյանին աջակցելու վերաբերյալ, կուսակցության ընդդիմադիր նախկին կեցվածքը տուժեց, վարկանիշն էլ ընկավ:
– Մենք դա նույնպես նկատում ենք, բայց առաջիկա աշխատանքները ցույց կտան, որ մենք ուղղակի չենք սատարել ու մի կողմ քաշվել: Ի սկզբանե առաջինը մենք ենք ձայն բարձրացրել հայ-թուրքական արձանագրությունների վերաբերյալ, բայց եթե կա մի դրական բան, ապա պետք է նշել, ցույց տալ, նույնիսկ ոգևորել: Եթե կա բացասականը, պիտի դա էլ բարձրաձայնել ու դրա հետ կապված մեր տեսակետն էլ հայտնել: Եթե մի բան ասում ես վատն է, ուրեմն պետք է հստակ լուծում առաջարկես: Մենք նորից կողմնակից ենք երկրում համակարգային փոփոխությունների:
– Իսկ դա ենթադրո՞ւմ է, որ Սերժ Սարգսյանի հրաժարականն եք պահանջելու:
– Պարտադիր չէ: Եթե համակարգը փոխվում է՝ անձի խնդիր չէ, համակարգի խնդիր է: Եթե համակարգը փոխվի, շատ մարդիկ համակարգից դուրս կմնան, չեն կարող աշխատել: Մենք որևէ անձի հետևից չենք գնում՝ «դու դուրս արի, ես գամ՝ նստեմ» տարբերակով, դա ժողովուրդն արդեն որպես իրականություն չի ընկալում: Դրա համար ավելի ճիշտ է, որ համակարգային փոփոխություններ արվեն: Պիտի մասնագետներից կազմված լինեն նախարարությունները, վարչությունները: Ով մասնագիտական կրթությամբ չի համապատասխանի՝ համակարգից դուրս կմնա: Եվ կապ չի ունենա նա բարձր պաշտոն է զբաղեցնում, թե ուղղակի չինովնիկ է:
– Այսինքն, համաձայն չե՞ք այն տեսակետների հետ, որ Հայաստանում ամեն ինչ մեկ անձ է որոշում, և կա անձի իշխանություն:
– Կան տեսակետներ, բայց համենայնդեպս՝ «անձի իշխանությունը» մի փոքր ուռճացված է: Նույն ՀՀԿ-ի մեջ տարբեր տեսակետներ են հնչում, դա նշանակում է, որ իշխող կուսակցության մեջ տարբեր հարցերի շուրջ բանավեճեր կան:
– Քաղաքական օրակարգում քննարկվող թիվ մեկ հարցը Մաքսային միությանն անդամագրվելու վերաբերյալ Սերժ Սարգսյանի հայտարարությունն է. Դուք ի՞նչ դիրքորոշում ունեք:
– Հիմա մի հնարավորություն կա. իհարկե, եվրոպական արժեքներ կան, որոնք ուզենք-չուզենք՝ կան, քանի որ Հայաստանը Ասիայի ու Եվրոպայի մեջտեղում է գտնվում: Բայց մենք առաջինը պետք է լուծենք մեր ազգային անվտանգության խնդիրը՝ թե որ միության հետ մեր ազգային անվտանգության խնդիրը գերակա կլինի: Պարզ ասեմ՝ այսօր մեզ մոտ, մեր սահմանին կանգնած են ռուսական սահմանապահ ուժերը: Այսինքն՝ մեր անվտանգությունը պահպանում են Ռուսաստանի սահմանապահ ուժերը՝ հայկական զինված ուժերի հետ համատեղ: Իսկ ինչ վերաբերում է արժեքներին, միանշանակ եվրոպական շատ արժեքներ կան, որոնց պետք է հետևել՝ անկախ նրանից մենք Եվրամիության մեջ կլինենք, չենք լինի: Այսինքն, եթե կա մի երկրում մի դրականը, որը մենք կարող ենք կիրառել ու հասնել արդյունքի, չպետք է նայենք, թե որտեղից է: Օրինակ՝ մարդու իրավունքների պաշտպանության տեսակետից Եվրոպան միանշանակ ավելի առաջ է, քան թե մենք: Ինչո՞ւ չընդօրինակենք մարդու իրավունքների պաշտպանությունը: Եթե ուշադրություն դարձնեք, նույն Ռուսաստանը՝ իր գրականությամբ, մշակութային դրսևորումներով, եվրոպական ընտանիքի մի մաս է: Չենք կարող ասել, որ այն Ճապոնիայի, Չինաստանի նման երկիր է: Նա էլ է գտնվում մեջտեղում: Ինքը տվել է եվրոպական արժեքներին և այնտեղից էլ իր մասով ինչ-որ բան վերցրել է: Այսինքն, պետք չէ միանգամից այդպես կտրուկ գիծ գծել ու վաղվանից դառնալ չգիտեմ ինչ: Որտեղից մեզ պետք է պետության համար՝ պետք է վերցնել ու գնալ առաջ:
