Պակիստանյան ռազմաօդային ուժերը ռմբակոծել են երկրի հյուսիս-արևմուտքում գտնվող գրոհայինների բազաները՝ մի շրջան, որը գտնվում է օրաքզայի ցեղի հսկողության տակ: Այդ գործողության հետևանքով զոհվել է 11 գրոհային: Այս մասին հայտնում է Reuters գործակալությունը` հղում անելով տեղի բարձրաստիճան պաշտոնյաներից մեկի խոսքերին:
Ավիառմբակոծումը տեղի է ունեցել այն բանից հետո, երբ նախօրեին տեղի թերթերից մեկում տեղեկություն է հայտնվել, թե Պակիստանի իշխանությունները ցանկանում են ռազմական գործողություններ իրականցնել Հյուսիսային Վազիրիստանում: Այս շրջանը սահմանակից է Աֆղանստանի հետ և հայտնի է «Ալ-Քաիդա» խմբավորման և «Թալիբան» շարժման հետ իր կապերով:
Ավելի վաղ տվյալ տարածքում ռմբակոծություն են իրականացրել ամերիկյան անօդաչու ինքնաթիռները: Մարտին այս ռմբակոծման ժամանակ վնասվել է բնակելի թաղամասը: Այս ռմբակոծություններն ակտիվացել են Ուսամա բեն Լադենի սպանությունից հետո:
Պակիստանը բազմիցս դեմ է հանդես եկել իր տարածքում իրականացվող ռմբակոծություններին, սակայն արևմտյան որոշ աղբյուրներ կարծում են, որ պակիստանյան հատուկ ծառայությունները համագործակցում են ամերիկյան ավիացիայի հետ:
