ՀՀ-ում Վրաստանի արտակարգ և լիազոր դեսպան Թենգիզ Շարմանաշվիլին այսօր լրագրողների հետ հադիպման ժամանակ շեշտեց, որ Վրաստանում քաղաքական իրավիճակը կայուն է և այդպես եղել է միշտ. «Մենք անկայունություն չենք համարում հանրահավաքների, բողոքի ակցիաների անցկացումը, քանզի դա յուրաքանչյուր քաղաքացու սահմանադրական իրավունքն է: Այդուամենայնիվ որոշ անպատասխանատու ուժեր խաղաղ հանրահավաքը դարձրել են ուժային դիմադրություն կառավարության նկատմամբ, ինչին էլ հետևել է կառավարության համապատասխան արձագանքը՝ զսպելու այդ անօրինականությունները»:
Շարմանաշվիլին տեղեկացրեց, որ անօրինական գործողությունների արդյունքում ներկա պահին մոտ 90 մարդ ենթարկվել է վարչական կալանքի՝ 30-60 օր ժամկետով, կան նաև քրեական պատասխանատվության ենթարկված անձինք:
Դեսպանը նշեց, որ իրականացվում է քննություն, որի ավարտից հետո անցկացվելու է արդար դատավարություն և մենք բոլորս կիմանանք այս անօրինականությունների պատճառը հանդիսացող անձանց անունները:
