«Ծառուկյան» դաշինքի ըմբոստացած 8 պատգամավորներից երեքը, ՀՀԿ-ում տեղ չլինելու պատճառով, դաշինքի ցուցակում հայտնված Խաչիկ Մանուկյանը, Հարություն Ղարագյոզյանը (Կարամելի Հարութ) և Արտյոմ Ծառուկյանը նախորդ շաբաթ վայր դրին պատգամավորական մանդատները։ Մյուս հինգի ճակատագիրն առայժմ անորոշ է։ ՀՀՇ վարչության նախագահ Արարատ Զուրաբյանը թեպետ հայտարարել է, որ որոշել է մանդատից չհրաժարվել, բայց տեսականորեն չէր բացառել մոտ ապագայում նման սցենարը։ Վահան Կարապետյանը (Չերիի Վահան) առայժմ անորոշության մեջ է՝ լրագրողների հետ զրույցում ասել է, որ որոշումը Ծառուկյանինն է։ Ինքը, փաստորեն, խոստացվածից ավելի քիչ ձայն է հավաքել՝ մոտ 9.000, բայց ամեն դեպքում ռեյտինգային ընտրակարգով դաշինքից թիվ 2 ընտրատարածքում ամենաշատ քվե ստացած պատգամավորն է։ Նապոլեոն Ազիզյանին մեկնաբանելը բավականին բարդ է՝ մեկ հայտարարում է, որ մանդատից ոչ մի դեպքում չի հրաժարվի, մեկ էլ պատրաստակամություն է հայտնում մանդատը փռել Ծառուկյանի ոտքերի տակ։ Մյուսը՝ Վայոց ձորի նախկին մարզպետ Սերգեյ Բագրատյանն է, որը մի քանի օր է՝ խուսափում է պատասխանել մեր հարցերին։ Մեր դիտարկմանը, թե արդյոք իրենց արգելել են խոսել լրատվամիջոցների հետ, Բագրատյանն ընդգծեց, որ իրեն ոչ ոք արգելել չի կարող՝ պարզապես զբաղված է։ Այսօր էլ հայտարարեց, թե հանձնաժողովի նիստի է։ Աբրահամ Մանուկյանի որդու ճակատագիրը ևս շարունակում է անորոշ մնալ։
«Առաջին լրատվական»-ի հետ զրույցում դաշինքի պատգամավորության նախկին թեկնածու Հակոբ Հակոբյանն ընդգծեց՝ քանի որ բոլորը տեղյակ էին, որ նախապես ինքնաբացարկի դիմումների տակ են ստորագրում, ապա պետք է պահեն քաղաքական պայմանավորվածությունը. «Պետք է յուրաքանչյուր մարդ կատարի քաղաքական համաձայնության ցանկացած որոշում։ Ես կարող եմ ասել, որ բոլորս ստորագրել ենք դիմումներ դուրս գալու համար։ Եղել է քաղաքական համաձայնություն՝ անկախ նրանից, թե թեկնածուն ցուցակի որ համարում կլինի․ եթե նա բավարար ձայներ չի ապահովել, այսինքն՝ չի ստացել բավարար քվե, պետք է տեղը զիջի այն թեկնածուին, որը ավելի շատ է վայելել ժողովրդի վստահությունը»։
Հակոբ Հակոբյանը անդրադառնալով ըմբոստացած, բայց առայժմ մանդատները պահպանած պատգամավորներին և մեր այն հարցին, թե նրանք ևս պետք է մանդատները վա՞յր դնեն, ասաց. «Կարծում եմ՝ այո՛։ Պետք է պահպանել քաղաքական համաձայնությունը»։
Դիտարկմանը՝ ինչո՞ւ այդ դեպքում բոլորը միանգամից չդրեցին մանդատները, ինչո՞ւ է ձգձգվում, Հակոբ Հակոբյանն արձագանքեց. «Ես չեմ կարող ասել՝ ինչու միանգամից չեն դնում մանդատները։ Իրենց փոխարեն չեմ կարող պատասխանել։ Բայց կարող եմ հորդորել, խորհուրդ տալ, որ քաղաքական պայմանավորվածությունը կատարեն»։ «Կարծում եմ, որ Ծառուկյանի որոշումը վերջնական է ու ճիշտ։ Ծառուկյանը երբեք սխալ բան չի անի՝ նրա մոտ խոսքը խոսք է։ Եթե Ծառուկյանն իր խոսքը կատարում է, մնացածն էլ պետք է պահեն»,- եզրափակեց նա։
