«Էր-Ռիադի» հռչակագրում, որը հրապարակվել է կիրակի անցկացված արաբա-իսլամական գագաթնաժողովի արդյունքներով, ընդգծվում է անհրաժեշտությունը դադարեցնելու իրանական ահաբեկչական սպառնալիքը Մերձավոր Արևելքում, հատկապես Սիրիայում, Իրաքում և Եմենում։
55 արաբական և մուսուլմանական պետությունների առաջնորդները, ինչպես նաև ԱՄՆ-ը, կողմ են հանդես եկել Իրանի կողմից կրոնական խմբավորումների աջակցության ու հարևան երկրներում Իրանի ընդլայնման դադարեցմանը, հատկապես Սիրիայում։ Չնայած այն բանին, որ հռչակագիրը չի վերաբերվել այդ կետերի իրագործման մեխանիզմներին, այն հաստատում է 34 հազար զինծառայողի տեսքով ուժի տրամադրման մասին համաձայնագիրը՝ Սիրիայում և Իրաքում ահաբեկչական սպառնալիքի դեմ անհրաժեշտության դեպքում։ Այս մասին գրում է հոդվածագիր Մանա Ալին սիրիական Baladi news-ում։
Քաղաքական առումով գագաթնաժողովը դարձել է չափազանց ուժեղ և հստակ ուղերձ Իրանին ու Ասադի ռեժիմին, քանի որ նրանք եղել են միակ չհրավիրված մուսուլմանական երկրները։ Սաուդյան Արաբիայի արտգործնախարար Ադել ալ-Ջուբեյրը և նրա ամերիկացի գործընկեր Թիլերսոնը հայտարարել են, որ այդ երկրները չեն հրավիրվել, քանի որ հանդիսանում են ահաբեկչության խոշորագույն հովանավորներ։
Սիրիայի հարցով զբաղվող քաղաքական գործիչներն ու մասնագետները գագաթնաժողովում և «Էր Ռիադի հռչակագրում» տեսել են կարևոր քայլ Իրանին հեռացնելու գործում։ Չնայած այն բանին, որ հեշտությամբ և միանգամից դա անել չի հաջողվի, նրանք կասկածի տակ են դրել Ասադի ռեժիմի ամենամեծ դաշնակցի դերը, որը բազմիցս փրկել է սիրիական ռեժիմին միջազգային ֆորումներում և Անվտանգության խորհրդում դատապարտումից։
Ինչ վերաբերվում է ռուսական սպառնալիքին և նրան դիմակայելու մեխանիզմներին, ապա սիրիացի լրագրող Հուսեյն ալ-Զուբին կարծում է, որ ռուսներին դիմակայելու համար որևէ ռազմական միություն չի ստեղծվի, սակայն կարող է ստեղծվել կոալիցիա՝ Մոսկվայի վրա այս կամ այն կերպ ճնշում գործադրելու համար։ Սիրիայից Ռուսաստանի դուրս գալու հարցը կապված է միջազգայնորեն համաձայնեցված ջանքերի հետ, որոնք, վերջիվերջո, կարող են արդյունք բերել Սիրիայում Ռուսաստանի շահերին դիմակայելու գործում։ Դրանք շահեր են, որոնք Ռուսաստանը պահանջում է ԱՄՆ-ից ճանաչել որպես սիրիական հարցով ցանկացած բանակցությունների կամ համաձայնագրերի պայման։
Վերլուծաբանները կարծում են, որ մինչդեռ բոլորը շարժվում են Սիրիայից Իրանի ուժային հեռացման ուղղությամբ, Ռուսաստանի տեսքով խոչընդոտը քաղաքական համաձայնեցման և եվրոպա-ամերիկյան գործարքների կարիք ունի։ Հավանաբար, Սաուդյան Արաբիան ինքնին կնպաստի դրանց կնքմանը՝ իր դաշնակիցների օգնությամբ։
