2011 թ. մայիսի 31-ին Վանաձորի ավտոկայանում կրկին բացակայում են Վանաձոր-Երևան ուղևորափոխադրում իրականացնող միկրոավտոբուսները:
Վանաձորցիները Երևան մեկնելու հնարավորություն ունեն անհատական երթուղային տաքսիներով՝ վճարելով նախատեսված 2000 դրամի փոխարեն 2500 դրամ:
Ավտոկայանում հավաքված մարդիկ նշում են, որ այսօր՝ մինչև ժամը 17:00-ն, միկրոավտոբուսներ չեն լինելու, քանի որ Երևանում հանրահավաք է:
Ավտոկայանում է նաև Հելսինկյան Քաղաքացիական Ասամբլեայի Վանաձորի գրասենյակի նախագահ Արթուր Սաքունցը, ով հեռախոսով իրավիճակը ներկայացրել է մարդու իրավունքների պաշտպանի գրասենյակի արագ արձագանքման խմբին՝ իրավիճակի շուտափույթ լուծման համար միջոցներ ձեռնարկելու նպատակով:
Հելսինկյան Քաղաքացիական Ասամբլեայի Վանաձորի գրասենյակի Սպիտակ, Ստեփանավան, Տաշիր, Ալավերդի քաղաքների ներկայացուցչություններից ևս տեղեկացնում են, որ Երևան մեկնելն անհնար է նաև մարզի նշված քաղաքներից:
Ի հավելումն՝ նշենք, որ առաջին միկրոավտոբուսը Վանաձորի ավտոկայանում կայանել է ժամը 12:45 րոպեին:
