«Ժառանգություն» կուսակցության առաջնորդ Րաֆֆի Հովհաննիսյանը տևական դադարից հետո լրագրողների հարցերին է պատասխանել՝ անդրադառնալով հետընտրական իրավիճակին և իրենց հետագա անելիքներին։ Հովհաննիսյանը մասնավորապես ընդգծել է, որ պայքարը շարունակելու համար պետք է գնալ խոշորացման, ինչի համար անհրաժեշտ է արտախորհրդարանական և խորհրդարանական ընդդիմադիր ուժերի միավորում։
Թե կոնկրետ որ ուժերին նկատի ունի Հովհաննիսյանը՝ առայժմ չի մանրամասնում։ Համենայնդեպս, ի տարբերություն կուսակցության փոխնախագահ Արմեն Մարտիրոսյանի, բավականին դրական է արտահայտվել խորհրդարանական ուժերից «Ելքի» մասին, արտախորհրդարանական ուժերի մասով դեռ մանրամասներ հայտնի չեն։ Տեղեկացանք, որ առաջիկա օրերին «Ժառանգություն» կուսակցությունը խորհրդի նիստ է անցկացնելու և քննարկելու է հետագա գործունեությանը վերաբերող հարցեր: Չի բացառվում, որ կքննարկվի նաև այն հարցը, թե որ ուժերի հետ է պատրաստվում ճանապարհ անցնել ընդդիմադիր քաղաքական ուժը։
«Նոր Հայաստան» հանրային փրկության ճակատի ֆորմատում «Ժառանգության» գործընկեր՝ «Ժողովրդավարական հայրենիք» կուսակցության ղեկավար Պետրոս Մակեյանը դրական է գնահատում միավորվելու գաղափարը։ «Առաջին լրատվական»-ի հետ զրույցում Մակեյանն ասաց, որ ինքը մշտապես տեսել է միավորվելու անհրաժեշտությունը. «Ես այդ հարցը դրել եմ մեր քաղաքական խորհրդում և ստացել հավանություն. միշտ այդ ուղղությամբ աշխատանք տարել եմ, բայց առայժմ անպտուղ. Նիկոլի, Րաֆֆու հետ այդ աշխատանքը դեռ վաղուց տարել եմ։ Պարզ է, որ այս վարչախմբի պարագայում փոքր ուժերի ապագան անորոշ է, և հստակ է, որ պետք է համախմբում»։
Հստակեցմանը, այսինքն՝ կարծում է, որ Հովհաննիսյանի ղեկավարած ուժի հետ ճանապարհ շարունակելը արդյունավե՞տ կլինի, Պետրոս Մակեյանն արձագանքեց. «Ես կարծում եմ՝ անուններ պետք չէ տալ։ Բայց այն ուժերը, որոնք դեռևս վարչախմբի հետ գործարքի մեջ չեն մտել, դեռևս հանրության համար ընկալելի են՝ պետք է համախմբվեն։ Այդպիսի ուժերն, իհարկե, քիչ են, բայց պետք է համախմբվեն»։
Ի տարբերություն Պետրոս Մակեյանի՝ ԱԻՄ առաջնորդ Պարույր Հայրիկյանը բավական կոշտ արտահայտվեց։ «Առաջին լրատվական»-ի հետ զրույցում նա ասաց, որ բոլորի նպատակը պետք է լինի Սահմանադրության վերականգնումը, իսկ նրանք, ովքեր շեղվում են օրակարգից, մեջբերում եմ՝ «սրիկա» են։
«Եթե ուրիշ բանով է ուզում զբաղվել, նշանակում է՝ զբաղվում է պարապ գործով։ Չեմ ասում՝ հիմար է և այլն, բայց նա, ով ուրիշ բանով է զբաղվում, սրիկա է։ Հիմնական հարցն այսօր Սահմանադրությունն է։ Ճիշտն ասած, ինքն իրեն ցույց տվեց խորհրդարանական ընտրություններում, ու իր մասին խոսելն ավելորդ եմ համարում»,- փոխանցեց Հայրիկյանը։
Հիշեցնենք. ԱԻՄ առաջնորդը ավելի վաղ մեզ հետ զրույցում ասել էր, որ նախատեսում է ստորագրահավաք սկսել՝ գործող Սահմանադրությունը չեղարկելու և նոր Սահմանադրություն ընդունելու պահանջով: «Հովհաննիսյանը ընտրության էր գնում հաղթելու, հիմա ի՞նչ եղավ՝ թեթևսոլիկացել մեջտեղ է ընկել։ Եթե Սահմանադրությունից չի խոսում, էլ ի՞նչ ասեմ։ Նա որևէ կերպ չնպաստեց, որ մեծ դաշինք կայանա, զբաղված էր ցուցամոլությամբ։ Չեմ վախենում հրապարակավ ասել, բայց հասցրեց այն աստիճանի, որ Զարուհին էլ հեռացավ իրենից»,- եզրափակեց Պարույր Հայրիկյանը։
