![](https://www.1in.am/assets/uploads/2017/05/^3DD6D939ECF3DA95942598FBC260C7E45D432C4463D62AFE33^pimgpsh_fullsize_distr.jpg)
Մայիսի 17-ին Էրեբունի և Նուբարաշեն վարչական շրջանների ընդհանուր իրավասության դատարանում քննվող քաղաքացիական գործի հերթական նիստի ժամանակ դատավոր Տաթևիկ Ստեփանյանը սահմանափակել է լրագրողների աշխատանքը՝ առանց որևէ հիմնավորման:
Դատավարության սկզբում «Առաջին լրատվական»-ի թղթակից Արման Ղարիբյանը դիմել է դատավորին՝ նիստը լուսանկարահանելու և տեսանկարահանելու թույլտվության համար: Դատավորը, ըստ օրենքի պահանջի, դիմել է դատավարության կողմերին՝ նրանց կարծիքը պարզելու համար: Դատավարության կողմերը չեն առարկել: Առարկություն է ներկայացրել միայն երրորդ կողմի ներկայացուցիչը, որը, սակայն, որևէ կերպ չի փորձել հիմնավորել իր առարկությունը:
Կողմերին լսելուց հետո դատավոր Ստեփանյանը որոշել է թույլ տալ լուսանկարահանել և տեսանկարահանել դատական նիստը, սակայն սահմանափակ ժամանակով: «15 րոպեից կանջատեք տեսախցիկը»,- հրահանգել է դատավորը:
Ուշագրավ է, որ նիստի առաջին 15 րոպեների ընթացքում են հարցաքննվել գործի վկաները, իսկ դրանից հետո, երբ այլևս թույլատրված չէր տեսանկարահանել, ուսումնասիրվել են գործում առկա փաստաթղթերը, որոնք ըստ էության որևէ կարևորություն չէին ներկայացնում:
Դատավարության ավարտից հետո «Առաջին լրատվական»-ի թղթակիցը փորձել է պարզել, թե ինչով էր պայմանավորված դատավորի՝ լրագրողի աշխատանքը սահմանափակելու որոշումը: Դատավոր Տաթևիկ Ստեփանյանին ակնհայտորեն դուր չի եկել, որ լրագրողը «հանդգնել է» մոտենալ իրեն և հարցեր ուղղել: Նա որևէ կերպ չի պարզաբանել իր որոշումը, միայն ընդգծել է, որ դատավորի որոշումները պարտադիր են բոլորի համար:
Լրագրող Արման Ղարիբյանը դիմել է ՀՀ Դատական դեպարտամենտի ղեկավար Կարեն Փոլադյանին՝ խնդրելով նրան իր լիազորությունների շրջանակում քայլեր ձեռնարկել լրագրողների աշխատանքը անհիմն սահմանափակումներից զերծ պահելու ուղղությամբ:
Նշենք, որ դատական նիստերը տեսանկարահանելու և լուսանկարահանելու ժամանակային սահմանափակումը լայնորեն կիրառվում է բազմաթիվ դատավորների կողմից՝ հիմնականում առանց որևէ հիմնավորման և պատճառաբանության: