Համացանցում հայտնվել է մի տեսանյութ, որը միաժամանակ խղճահարություն և նողկանք է առաջացնում: «Հերոսուհին»` Գեղարքունիքի մարզից մի աղջիկ, ընտրությունների ժամանակ, փողի խոստման դիմաց, «հավաքագրվել» է «Ծառուկյան» դաշինքի կողմից: Նա, իր պես հարյուրավոր, հազարավորների նման, ներգրավված է եղել ընտրակեղծարարության կեղտոտ մեխանիզմում. ընտրողներից անձնագրերի տվյալներ են հավաքել, հետո` ընտրակաշառք բաժանել և ուղղորդել-վերահսկել են ընտրողի քվեարկությունը:
Աղջկա կցկտուր պատմածներից կարելի է ենթադրել, որ ընտրությունների ժամանակ, կենտրոնական շտաբին զուգահեռ կամ գուցե նրա գլխին` որպես մահակ, գործել է մի մարմին` իր բնույթով ռեպրեսիվ ոստիկանություն, որը կատարել է կոռուպցիոն-վերահսկողական գործառույթ: Այս մարմինը, որն, ըստ մեր տեղեկությունների, «Ծառուկյան» դաշինքում ղեկավարել է Ծառուկյանի թիկնազորի ամենակարող պետ Էդոն, վերահսկել է ոչ միայն «ցուցակագրված» ընտրողների վարքագիծը, այլ նաև «ճշտով» բաժանել է դաշինքի ռեյտինգային թեկնածուների «ազդեցության գոտիները», վերահսկել նրանց տրամադրված ահռելի ֆինանսական միջոցների ծախսման, դաշինքի դեպքում` մսխման գործընթացը:
Ծառուկյանի «ժանդարմեան» գործել է նախընտրական շտաբի պետ Իշխան Զաքարյանի հետ հակադրության ռեժիմում ու հենց սրա հետևանք է մանդատակռվի այն նողկալի տեսարանը, որին ականատես եղանք հետընտրական շրջանում:
Կենտրոնական շտաբն ու ռեյտինգային շատ թեկնածուներ պարզապես «քցել» են ոչ միայն Ծառուկյանին, այլ նաև` շատ «ակտիվիստների»` չվճարելով նրանց փողերը, ինչպես դա տեղի է ունեցել հիշատակված տեսանյութի հերոսուհու հետ:
Այս օրերին իսկապես հագեցած է Ծառուկյանի Էդոյի «աշխատանքային» գրաֆիկը. նա ոչ միայն «մաքրում» է Իշխան Զաքարյանի դավադրության հետևանքները, այլ նաև զբաղված է շատ լուրջ գումարների «վազվռատով»:
Նման ավելի լուրջ կոռուպցիոն-վերակսկողական կառույց` «ժանդարմեա», գործել է նաև ՀՀԿ-ում: Այստեղից արտահոսքեր, ըստ էության, չկան, որովհետև ամեն ինչ եղել է Սերժ Սարգսյանի աչալուրջ հայացքի ներքո, իսկ գործը կազմակերպել է` ոչ թե ինչ-որ «պալաչ», այլ հմուտ ապարատային չինովնիկ Հովհաննես Հովսեփյանն, ով, ի դեպ, երեկ վերանշանակվել է նախագահի վերահսկողության ծառայության պետի պաշտոնում: Հովսեփյանը հետընտրական հարցազրույցներից մեկում խոսել էր ինչ-որ «տասնապետների», «հարյուրապետների», «բացարձակապես անկախ մարդկանց» մասին, ովքեր, ըստ էության, վերահսկել են ոչ միայն ՀՀԿ կոչվող համակարգը, նրա թեկնածուներին, նրանց փոխհարաբերությունները, այլ նաև հարյուր հազարավոր ընտրողների վարքագծից:
Ընտրություններից հետո` Հովսեփյանն ոչ մի տեղ չի գնացել, թոշակի չի անցել, նշանակվել է լուրջ պետական աշխատանքի` իր հարուստ «փորձով»: Այն, ինչ փորձարկվել է ընտրությունների ժամանակ` շատ հանգիստ կարող է կիրառվել այլ ոլորտներում, պետական գործառույթներում: Արատավոր համակարգը կա, գործում է, ավելին` ներմուծվել է պետական կառույց, իսկ դա նշանակում է, որ վտանգվում է ոչ թե մեկ ընտրություն կամ ընտրական ցիկլ, այլ երկրի զարգացման հեռանկար:
Պետությունը չի կարող զարգանալ, եթե հիմնված է քաղաքացուն նվաստեցնելու և հարկադրելու կոռուպցիոն-վերահսկողական համակարգի վրա:
