«Հայոց աշխարհ»-ը զրուցել է «Ժառանգություն» խորհրդարանական խմբակցության անդամ Արմեն Մարտիրոսյանի հետ։ Թերթի հարցին, թե արդյոք համաներումը հաղթանակ է և մինչև արտահերթ ընտրություններ և իշխանություն կես քայլ է, Ա. Մարտիրոսյանը պատասխանել է. «Նայած ի՞նչ ես հասկանում հաղթանակ ասելով։ «Ժառանգության», որոշակիորեն նաև հասարակության համար հաղթանակը, կարծում եմ, որակական փոփոխությունն է կառավարման ամբողջ համակարգում, որի արդյունքում քաղաքացին դառնում է գործոն, քաղաքացու պահանջները բավարարվում են անհատական մակարդակով, ինչի շնորհիվ կանխվում է արտագաղթը։ Դժբախտաբար այդ ուղղությամբ իրականացվող քայլեր այս պահին չեմ տեսնում։ Չեմ բացառում, որ որոշակի շրջանակներում մասնակի՝ ոչ ամբողջական իշխանափոխություն լինի, և ՀԱԿ-ը դառնա իշխանության մաս։
Բայց դա չի նշանակում, թե կարելի է խոսել արմատական բարեփոխումների մասին՝ այն, ինչը ինձ, որպես «ռոմանտիկ» քաղաքական գործչի, հետաքրքրում է առաջին հերթին։ Երկրորդ՝ եթե այս քայլերը ՀԱԿ-ը համարում է իր հաղթանակը, սա ինձ համար առնվազն անհասկանալի է, որովհետև 2008թ. Ազատության հրապարակը բաց էր, մինչև մարտի 1-ը քաղբանտարկյալներ, ըստ էության, չկային «Մարտի 1»-ի բացահայտման խնդիր էլ ընդհանրապես գոյություն չուներ։ Այսինքն՝ վերադարձել ենք ի շրջանս յուր։ Եթե ելման կետին վերադառնալն ինչ-որ մեկի համար հաղթանակ է, մեզ համար, իհարկե, այդպես չէ։ Ինչ վերաբերում է արտահերթ ընտրություններին, արտահերթ զարգացումներ այս պահին կարծես թե չեն նշմարվում»։ Անդրադառնալով կարծիքներին, թե ձևավորվել է հստակ արտահայտված երկու բևեռ՝ իշխանություն՝ ի դեմս կոալիցիոն եռյակի և ընդդիմություն՝ ի դեմս ՀԱԿ-ի, և այս դեպքում «Ժառանգության» տեղին քաղաքական խճանկարում, Ա. Մարտիրոսյանը պատասխանել է, որ համաձայն չէ այդ հարցադրմանը. «Քաղաքական կոնֆիգուրացիան կհստակեցվի ավելի ուշ, և դրանից հետո շատ դինամիկ զարգացումներ կլինեն։ Իշխանություն-ՀԱԿ երկխոսության արդյունքում ավելի մեծ դաշտ է ազատվում ընդդիմադիր ուժերի համագործակցության համար։ Հավանականություն եմ տեսնում, որ «Ժառանգությունը» հայտ կներկայացնի լինելու միջնորդ քաղաքական ուժ»։
Թերթի հարցին, թե կարելի՞ է ասել, որ վերադասավորումների գործընթացը հետաձգվում է մինչև աշուն, Մարտիրոսյանը պատասխանել է. «Այս ամառը կարող է քաղաքականապես ակտիվ լինել, քանի որ վերջինն է խորհրդարանական ընտրություններից առաջ: Որևէ մեկը չի պատրաստվում ձեռքերը ծալած նստել՝ սպասել աշնանային զարգացումներին: Ուստի հնարավոր է, որ ամռան ընթացքում էլ բավական էական տեղաշարժեր լինեն, բայց ամենայն հավանականությամբ հիմնական գործընթացները կծավալվեն աշնանը, որովհետև սեպտեմբերի 1-ից արդեն միանգամից մտնելու ենք նոր փուլ, երբ բոլոր քաղաքական ուժերը դինամիկ պայքար են սկսելու առավելագույն հասարակական աջակցություն ապահովելու համար»։