«Նախախորհրդարանի» անդամ Լարիսա Ալավերդյանը լուրջ կասկածներ ունի, որ «Հարսնաքար» ռեստորանային համալիրում անցյալ տարվա հունիսի 17-ին տեղի ունեցած ծեծի գործով արդար նախաքննություն, քննություն և դատավարություն է ընթացել: Նման տեսակետ նա հայտնեց «Առաջին լրատվական»-ի հետ զրույցում:
«Եթե հարցնեք, այսպես կոչված, 4 իրավաբաններին, նրանք ասելու են՝ սա է խնդիրը: Մինչդեռ ես կասկածում եմ դատական գործընթացի օբյեկտիվությանը և ամբողջականությանը: Ցանկացած գործ կարելի է այնպես կարել, որ արժանանա այս կամ այն գնահատականի»,- ասաց նա՝ կրկին շեշետելով, որ ինքը չի վստահում դատական գործի արդարությանը:
Հիշեցնենք, որ «Հարսնաքար» ռեստորանային համալիրում անցյալ տարվա հունիսի 17-ին տեղի ունեցած ծեծի գործով այսօրվա դատական նիստի ժամանակ մեղադրող Արթուր Դավթյանը 13-ական տարվա ազատազրկում և 100-հազարական դրամ (մոտ 250 դոլար) տուգանք պահանջեց բոլոր վեց ամբաստանյալների համար:
Հիշեցնենք նաև, որ գործարար, Հայաստանի ֆուտբոլի ֆեդերացիայի նախագահ, Ազգային ժողովի նախկին պատգամավոր Ռուբեն Հայրապետյանին պատկանող «Հարսնաքար» ռեստորանում դաժան ծեծից 12 օր անց` հունիսի 29-ին, այդպես էլ գիտակցության չգալով՝ մահացել էր ռազմական բժիշկ Վահե Ավետյանը:
Լուսանկարը՝ PanARMENIAN Photo-ի
