ՀՀԿ-ն խոսում էր սերնդափոխության, ինքնամաքրման մասին. արդյո՞ք Արա Բաբլոյանին ԱԺ նախագահի պաշտոնում առաջադրելը վկայում է այս մասին. «Առաջին լրատվական»- ի հետ զրույցում անդրադառնալով այս հարցին՝ ՄԱՀՀ-ի հիմնադիր, քաղաքագետ Ստյոպա Սաֆարյանը նշեց. «ՀՀԿ-ի նախկինում տված ոչ մի խոստման պետք չէ լուրջ վերաբերվել, որովհետև գնալով նրանց կառավարման շրջանում ակնհայտ է դառում, որ հնչեցված հայտարարությունները բացարձակապես կապ չունեն իրականության հետ, և այդպիսի նպատակ դրված էլ չէ:
Երիտասարդ հանրապետականների քողածածկույթի տակ կրկին խորհրդարան բերեցին ՀՀԿ-ական կորիզը, մարդկանց, ում վրա հենվում է ոչ միայն ՀՀԿ-ն, այլ նաև ամբողջ իշխանական բուրգը: Այդ հայտարարությունները պետք է դիտարկել նախընտրական քարոզչության տրամաբանության ներքո և լուրջ սպասումներ չունենալ, որ խորհրդարանի երիտասարդացման միտումները լուրջ են: ՀՀԿ-ն գնաց երիտասարդացման իմիտացիայի ճանապարհով»:
Քաղաքագետի դիտարկմամբ՝ Ա. Բաբլոյանի թեկնածության ընտրությունը պայմանավորված է մի քանի հանգամանքներով՝ առաջին հերթին նա որևէ թիմի չի հարել, լոյալություն և հավատարմություն է ունեցել մեկ անձի՝ ՀՀԿ ղեկավար, ՀՀ նախագահ Ս. Սարգսյանի նկատմամբ, բացի դրանից՝ նա իր անցած ճանապարհով անընդունելի չէ ՀՀԿ-ի ներքին տարբեր խմբավորումների համար, ՀՀԿ-ից դուրս ևս բուռն ռեակցիաներ չի առաջացնում նրա թեկնածությունը. «Կարելի է ասել՝ ընտրվել է մի տարբերակ, որի շուրջ աղմուկ չի լինի, և ով չափազանց հավատարիմ է Ս. Սարգսյանին»:
Քաղաքագետի խոսքով՝ Ս. Սարգսյանի համար դիտարկման շրջան է սկսվել՝ տեսնելու, թե ովքեր են իր հավատարիմները, ում կվարձատրի 2018-ից հետո, և կա՞ն արդյոք մարդիկ, որ իրեն արդեն անցյալ են համարում: Եթե անհրաժեշտ լինի, նա նոր զտումներ կանի:
Ս. Սաֆարյանի դիտարկմամբ՝ 2018-ից հետո վարչապետի պաշտոնի շուրջ անորոշությունը մտածված խաղ է Սերժ Սարգսյանի կողմից: «Իր վերաբերյալ անորոշությունը, թե ինքն ուր կգնա 12018-ից հետո, նրա գործոնը պահում է որպես դոմինանտ, անորոշության պայմաններում նրա քաղաքական կշիռը բավականին մեծանում է»,- նշեց քաղաքագետը:
Մանրամասները՝ տեսանյութում:
