Грузия Online-ի փոխանցմամբ, Վրաստանի նախագահ Միխեիլ Սաակաշվիլին խիստ նկատողություն է հայտարարել առողջապահության նախարարին՝ պահանջելով պատժել այն բժիշկներին, ովքեր մեղավոր են 3 տարեկան երեխայի մահվան մեջ։
Սաակաշվիլին դեպքի կապակցությամբ լրագրողներին պատմել է հետևյալը. «Դեդոփլիսծղարոյում օձը խայթել էր հովվի 3 տարեկան երեխային, որից հետո նրան տեղափոխել էին տեղի հիվանդանոց։ Այնտեղ երեխան մնացել է 7 ժամ, սակայն որևէ բժշկական օգնություն չի ստացել։ Հետագայում, երբ հասկացել են, որ երեխան մահանում է, նրան փոխադրել են Թբիլիսի, սակայն ճանապարհին երեխան մահացել է։
Հավանաբար բժիշկները կարծել են, որ հովվի երեխան որբ է և իրենց մոտ է հայտնվել ինչ-որ արոտավայրից, դրա համար էլ նրան լիակատար անուշադրության են մատնել։ Այժմ նրանք պետք է խիստ պատիժ կրեն, ինչը դաս կլինի նաև մյուսների համար։ Ես խիստ խոսակցություն եմ ունեցել առողջապահության նախարարի հետ և հայտնել եմ, որ մտադիր չեմ Վրաստանում հանդուրժել այդպիսի դեպքերը։ Այստեղ այլևս չպետք է նմանատիպ դեպքեր կրկնվեն»։
