Մայիսի 31-ի՝ ՀԱԿ-ի հանրահավաքից առաջ համաներման և դրա պատճառների ու արդյունքների մասին «Կապիտալը» զրուցել է ՀԱԿ-ի իրավական աջակցության կենտրոնի ղեկավար, ՀՀ Գլխավոր դատախազի նախկին տեղակալ Գագիկ Ջհանգիրյանի հետ: Անդրադառնալով նախագահի կողմից կիրառված համաներմանը` Գ. Ջհանգիրյանը նշել է. «Այս տարի լրանում է Հայաստանի Հանրապետության 20-ամյակը, և համաներման ակտի ընդունումը սպասելի ու տրամաբանական էր:
Բայց եթե այդպես է, ապա այն պետք է ընդունվեր սեպտեմբերի 21-ի նախօրյակին և ոչ թե մայիսի 28-ի: Ահա թե ինչու համոզված եմ, որ ընդունված համաներման հիմնական շարժառիթը Հայ ազգային կոնգրեսի թվով երրորդ` քաղբանտարկյալների ազատ արձակման պահանջի կատարումն էր: Առհասարակ, համաներման ակտի ընդունումը պետությունների պրակտիկայում մարդասիրական քայլ է, որը հիմնականում զուգակցվում է պետական տոների կամ այլ կարևորագույն իրադարձությունների հետ»: Թերթի հարցին, թե նմանատիպ ակտերը որքանով կարող են փոխել իրավիճակն իրավական ու քաղաքական դաշտում, Գ. Ջհանգիրյանը պատասխանել է. «Այն, որ համաներումն ընդունվել է ՀԱԿ-ի և միջազգային կառույցների ճնշման արդյունքում, ակնհայտ է: Իսկ ինչքանով է փոխվելու քաղաքական իրավիճակը համաներման արդյունքում՝ կառաջարկեմ մեզ հետ միասին արձանագրել Ազատության հրապարակում կայանալիք ՀԱԿ-ի հանրահավաքում»:
Ինչ վերաբերում է արտահերթ ընտրություններին և իշխանությունների այն պնդումներին, որ իրենց օրակարգում այդ հարցը չկա և չի լինելու, Գագիկ Ջհանգիրյանը ասել է. «Իշխանությունների օրակարգում չկար նաև Մարտի 1-ը բացահայտելու հարց։ Իշխանությունների օրակարգում չկար Ազատության հրապարակն ընդդիմության համար բացելու հարց: Իշխանությունների օրակարգում չկար քաղբանտարկյալներին ազատ արձակելու հարց, և նրանք պնդում էին, որ բոլորը հանցագործներ են և պետք է իրենց պատիժը կրեն մինչև վերջ։ Այնպես որ, դրանք ընդամենը իշխանությունների հայտարարություններ են։
Ես կարծում եմ, որ այսօրվա հանրահավաքում, երբ մեր հայտնի քաղբանտարկյալները՝ Նիկոլը և Սասունը, ելույթ կունենան Ազատության հրապարակի հարթակից, ամենայն հավանականությամբ, մեր առաջնորդը կհայտարարի, որ մեր երեք պահանջները կատարված են, և մենք պատրաստ ենք երկխոսության։ Ես վստահ եմ, որ ի վերջո համաժողովրդական ճնշման արդյունքում իշխանությունները կգնան արտահերթ նախագահական և խորհրդարանական ընտրությունների։ Պետք է նշեմ, որ արտահերթ ընտրություններն ընդդիմության համար, որպես քաղաքական պայքարի հանգրվան, կարևոր են, սակայն այն կարևոր է նաև իշխանության համար, քանի որ այսօր վտանգված է Հայաստանի և Ղարաբաղի ապագան։ Ես չեմ կարծում, որ այս իշխանություններն ունակ են լուծելու երկրի առջև ծառացած քաղաքական ու տնտեսական մարտահրավերներից որևէ մեկը, ինչի ականատեսն ենք եղել անցած երեք տարիներին: Ուստի կարծում եմ, որ պարտադրված են լինելու գնալ արտահերթ ընտրությունների, և որքան շուտ, այնքան լավ»։