Թուրքիայի էկոնոմիկայի նախարար Նիհաթ Զեյբեքչին հայտնել է, որ թուրքական կողմը չի ընդունում ռուս-թուրքական առևտրային հարաբերություններում առկա «սահմանափակումներ» եզրույթը՝ հայտնում է թուրքական Anadolu լրատվական գործակալությունը:
«Ռուսական կողմը խրախուսում է լոլիկի ներքին արտադրությունը, սակայն թուրքական կողմը, ինչպես նախկինում, չի ընդունում «սահմանափակումներ» եզրույթը: Մենք գտնում ենք, որ որևէ սահմանափակում չպետք է լինի երկու երկրների միջև: Մենք կսպասենք մինչև մայիսի վերջy և հետո կձգտենք Ռուսաստանի հետ գալ սկզբունքային համաձայնության»,- ասել է Թուրքիայի էկոնոմիկայի նախարարը:
Նա նշել է, որ ռուս-թուրքական առևտրային հարաբերությունները բավականաչափ կարգավորվել են, և դեպի Ռուսաստան լոլիկի արտահանման դադարեցումը Թուրքիայի համար չի նշանակում «աշխարհի վերջը»:
Հիշեցնենք, որ Ռուսաստանը 2016-ի հունվարի 1-ից թուրքական որոշ ապրանքատեսակների ներմուծման վրա արգելանք էր սահմանել: Ռուսական կողմի սահմանափակման պատճառը թուրքական զինված ուժերի կողմից ռուսական Սու-24 ինքնաթիռի ոչնչացումն էր:
