Օրերս կազմակերպված հերթական ցույցի արդյունքում «Վանաձոր-Քիմպրոմ» գործարանի աշխատակիցները երեկ դարձյալ 1 ամսվա աշխատավարձ են ստացել: Այդ մասին «Առաջին լրատվական»-ին փոխանցեցին գործարանի աշխատակիցները` նշելով, որ դա հունիս ամսվա աշխատավարձն է: Մինչդեռ գործարանը դեռ 2011 թվականից աշխատավարձի պարտքեր ունի աշխատողներին:
Նրանք նաև տեղեկացրին, որ պահանջ են ներկայացրել գործարանի ղեկավարությանը` հստակ պատասխանելու` երբ, վերջապես, կվերագործարկվի «Քիմպրոմը», այլապես իրենք մտածելու են այլ աշխատանք գտնելու մասին: Մայիս ամսից աշխատողներին տուն են ուղարկել, և «Քիմպրոմում» ոչ մի արտադրամաս չի գործում:
Տնօրինությունն աշխատողներին երեքշաբթի օրը գործարան է կանչել: Նրանց փոխանցմամբ՝ այդ օրն էլ պատասխանելու է առաջադրված հարցին: