Աբխազիայի նախագահ Սերգեյ Բաղապշի մահն այս պահին հարցականի տակ է դրել այն, թե ով է լինելու նրա հաջորդը և դրանից ելնելով էլ հարց է առաջանում, թե ինչ քաղաքական փոփոխություններ կլինեն Աբխազիայում:
Քաղաքագետ Իգոր Մուրադյանի գնահատմամբ՝ Աբխազիայում էական փոփոխություն չի լինի. «Աբխազիայի քաղաքական էլիտան, չնայած որոշ տարաձայնություններին, բավականին միասնական է Աբխազիայի անկախության հարցում, և պետք չէ մտածել, թե արտաքին, մասնավորապես ռուսական ազդեցությունը Աբխազիայում չափազանց մեծ է»:
«Առաջին լրատվականի» հետ զրույցում Մուրադյանը նկատեց, որ Ռուսաստանի ազդեցությունը Աբխազիայում մեծ է տնտեսական, պաշտպանության և այլ բնագավառներում, սակայն անկախության առումով Ռուսաստանը դեռևս միջամտել չի կարող Աբխազիայի ղեկավարության գործերին, ավելին` հենց Ռուսաստանն է հետաքրքրված Աբխազիայի անկախությամբ:
Այդուամենայնիվ, ըստ քաղաքագետի, եթե Մեդվեդևի վարչակազմն ամրապնդի իր դիրքերը, և Մեդվեդևը ևս մեկ անգամ նախագահ դառնա, ապա նրա շրջապատը հակված է Աբխազիայի հարցում որոշ զիջումների գնալ Վրաստանի օգտին:
«Որոշակի զիջումների հնարավորությունը, իհարկե, ռուսական քաղաքական էլիտայում քննարկվում է, սակայն դա դեռ չի նշանակում, որ դա իրականություն կդառնա»,- մանրամասնեց Մուրադյանը: