Ադրբեջանական Salam News գործակալության փոխանցմամբ, Թուրքիայի արտգործնախարար Ահմեդ Դավութօղլուն սիրիական իշխանություններին կոչ է արել դադարեցնել երկրում շարունակվող արյունահեղությունն ու բռնությունները։ Չնայած դրան, Դավութօղլուն ընդգծել է, որ երկու երկրների միջև հարաբերությունները շարունակում են մնալ «սերտ»։
Տեղական Sawasiah իրավապաշտպան կազմակերպության տվյալներով, հուզումների մեկնարկից մինչ օրս սիրիական ոստիկանությունը գնդակահարել է 1300 ցուցարարի։
Հիշեցնենք, որ մայիսի 25-ին Թուրքական Milliyet թերթը, վկայակոչելով Իսրայելի կառավարությանը մոտ կանգնած DEBKA հետախուզական կայքը, նշել էր, որ Սիրիայի նախագահ Բաշար Ասադն արագորեն կորցնում է Թուրքիայի վարչապետ Էրդողանի ու մուսուլմանական աշխարհի աջակցությունը.
«DEBKA-ի տվյալներով, Էրդողանը կառավարության ներկայացուցիչների հետ դռնփակ հանդիպման ժամանակ նույնիսկ հրահանգել է կարճ ժամանակահատվածում խզել Դամասկոսի հետ հարաբերությունները: Դա հիմնականում պայմանավորված է քրդական գործոնով:
Էրդողանի վճիռն ազդեցություն կունենա թուրք-իսրայելական հարաբերությունների վրա: Էրդողանը սիրիական ընդդիմադիր առաջնորդներին թույլատրել է մայիսի 31-ից հունիսի 2-ը հանդիպումներ ունենալ Թուրքիայում»:
