Օրերս մի խումբ ազատամարտիկներ Պաշտպանության նախարարությունում հանդիպեցին փոխնախարար Դավիթ Տոնոյանի և նախարարության մի շարք վարչությունների աշխատակիցների հետ: Ազատամարտիկները փոխնախարարին գրավոր ներկայացրեցին իրենց՝ թվով 13 պահանջները:
Ինպես «Առաջին լրատվական»-ի հետ զրույցում ասաց ազատամարտիկ, պահեստազորի գնդապետ Վոլոդյա Ավետիսյանը, նախարարության աշխատակիցների հետ եկել են ընդհանուր հայտարարի, իրենց խոստացել են իրականացնել բոլոր 13 պահանջները:
Այս տարի կլուծվի ազատամարտիկների թոշակի խնդիրը, արդեն 2014 թվականից հաշմանդամության համար թոշակ ստացող ազատամարտիկները կստանան կրկնակի կենսաթոշակ, իսկ նրանք, ովքեր չունեն հաշմանդամություն, սակայն կամավոր մասնակցել են պատերազմին, ամսական կստանան 50 հազար դրամ պարգևավճար:
Բացի այդ, փոփոխության է ենթարկվելու ազատամարտիկների մասին օրենքը, որի անվան մեջ առկա է «երկրապահ» բառը. ««Երկրապահ կամավորականի մասին» օրենքը այդ կառույցի հետ կապ չունի, բայց քանի որ անունն է շոշափվում, մենք պահանջում ենք «երկրապահ» բառը հանել: Մեզ տեղեկացրին, որ իրավաբանները կզբաղվեն այդ հարցով, և այս հարցը նույնպես կքննարկի»:
«Առաջին լրատվական»-ը զրուցեց նաև Ազատության հրապարակում նստացույց հայտարարած ազատամարտիկների խմբի հետ: Մեզ հետ զրույցում ազատամարտիկ, փոխգնդապետ Խաչիկ Ավետիսյանն ասաց, որ եթե Պաշտպանության նախարարությունում լուծեն ազատամարտիկների խնդիրները, շատ լավ կլինի, քանի որ շատ ազատամարտիկներ սոցիալական խնդիրներ ունեն։ Սակայն նա նշեց,որ իրենց խումբը բոլոր պահանջներն Ազատության հրապարակից է բարձրաձայում. «Քսան տարի անընդհատ նույն վիճակն է եղել, ես վստահ չեմ, որ որևէ հարց կլուծվի այդ ձևով, ես չեմ հավատում այս իշխանություններին: Հերթական անգամ Վոլոդյա Ավետիսյանի խմբին կխաբեն, ու հարցը չի լուծվի»:
Խաչիկ Ավետիսյանն ասաց, որ իրենց պայքարը ոչ թե սոցիալական հարցերին է ուղղված, այլ՝ իշխանափոխությանը: Դրա համար ուզում են համախմբել ողջ հայությանը, ստեղծել աշխարհազոր, կառավարման նոր համակարգ, որից հետո հնարավոր կլինի իշխանափոխություն իրականացնել։
