eBay առցանց աճուրդում վաճառքի հանված Նարեկացու բացառիկ ձեռագիրը դեռևս Մատենադարանում չէ, բայց արդեն Հայաստանում է: Ինչպես PanARMENIAN.Net-ի թղթակցին ասել է «Մատենադարան» Մաշտոցի անվան հին ձեռագրերի գիտահետազոտական ինստիտուտի տնօրեն Հրաչյա Թամրազյանը, սպասում են ձեռագիրը գնած Comedy Club Production ընկերության գլխավոր սեփականատեր Արթուր Ջանիբեկյանի ներկայացուցիչներին, ովքեր էլ այն պաշտոնապես կհանձնեն Մատենադարանին, բայց կոնկրետ օր դեռ նշանակված չէ:
Հարցին՝ ինչպե՞ս են պարզել վաճառքի հանված ձեռագրի իսկությունը, Թամրազյանն ասել է, որ այն հետազոտել են Մատենադարանում:
Օգոստոսի սկզբին Նարեկացու բացառիկ հայկական ձեռագրերից մեկն eBay-ում աճուրդի էր հանվել, ինչից հետո Մատենադարանից կապ էին հաստատել վաճառողի հետ ու տվյալներ պահանջել:
Իմանալով, որ ձեռագիրն աճուրդի է հանվել, Արթուր Ջանիբեկյանը կապվել էր ձեռագրի սեփականատիրոջ հետ ու օգոստոսի 25-ին պայմանավորվել աճուրդը դադարեցնելու մասին:
Ձեռագրի նախնական արժեքը 30.000 ԱՄՆ դոլար էր, իսկ աճուրդի վերջնաժամկետն օգոստոսի 26-ն է:
