Գորիսի նախկին քաղաքապետ Սամվել Հարությունյանն «Առաջին լրատվական»-ի հետ զրույցում, խոսելով Սուրեն Խաչատրյանի որդու նկատմամբ քրեական հետապնդումը դադարեցնելու որոշման մասին, նշեց, որ ընդհանրապես Սուրեն Խաչատրյանին կամ նրա բանդայի որևէ անդամին քրեական պատասխանատվության առաջ չկանգնեցնելու այս որոշումը «ճչացող անարդարություն է, ամբարտավանություն և մարտնչող հակաժողովրդական, հակազգային վարք»:
Նրանց հեղինակները, ըստ մեր զրուցակցի, այդ որոշումով ապացուցում են, որ «Հայաստանն այլևս բիրտ ռեժիմի ներկայացուցիչների, Լիսկայի, նրա բանդայի և ընդհանրապես լիսկայության վայրի կամայականության դաշտ է, հայ մարդկանց որսատեղի»:
«Ձևակերպել են որ իբր Բուդաղյանները գնացել և հարձակվել են Լիսկայի առանձնատան վրա, և ձևակերպել են, որ նրանք ինքնապաշտպանության մղումով են սպանել Ավետիք Բուդաղյանին և մահվան դուռը հասցրել գնդապետ Արտակ Բուդաղյանին»,- ասաց Սամվել Հարությունյանը՝ հավելելով, որ գոնե հիմա պետք է սթափվեն պարտաճանաչ, մտահոգ, մեր ժողովրդի լավագույն ապագային ձգտող, պատասխանատվության զգացում ունեցող բոլոր վճռական և հանդուգն հայերը: Ըստ նրա՝ հրամայական անհրաժեշտություն է այլևս «Ազատության հրապարակում բոլորվելը, բռնուցքվելը և հանդուգն վճռականությամբ մեր պայքարի օվկանածուփ մրրիկի արդյունքում վերջապես այս հրեշավոր ռեժմից ազատվելը ու պատմության աղբանոցը մեզ պարտադրված արյունոտ լուծը նետելը»:
Սամվել Հարությունյանը համոզմունք հայտնեց, որ Գյումրիի Վարդան Ղակասյանը, Ռուբեն Հայրապետյանը և նրանց նմանները բարձրագույն իշխանավորների համար շատ ավելի քիչ կարևորություն ունեն, քան, իր իսկ բնորոշմամբ, տխրահռչակ Լիսկան:
«Նա, ըստ ամենայնի, 1994-ից հետո բոլոր իշխանությունների վերարտադրման ուղղությամբ բազմապատիկ անգամ ավելին է արել, քան որևէ այլ մեկը, և չեն ուշացել վարձատրությունները՝ կախված նրա ոճրագործության չափից, մասշտաբից, և նրան, իբրև պարգևատրություն, չեն ուշացել պետական բարձր պարգևները»,- հավելեց նա:
Ս. Հարությունյանը չի բացառում, որ Սուրեն Խաչատրյանին նաև ազգային հերոսի կոչում կտան՝ նրա հետագա անելիքների համար:
«Համոզված եմ նրան վերապահված է շատ ավելի սև ու մեծ դերակատարություն մեր ժողովրդի նկատմամբ հետագայում դրսևորվելիք վերաբերմունքով հակահայկական և հակազգային քաղաքականության մեջ: Ըստ իս, եթե այսպես շարունակվի, ապա ազգային վերջնական աղետը չի ուշանալու և մենք պարզապես կանգնելու ենք կոտրած տաշտակի առաջ: Ես ապավինում եմ մեր ժողովրդի պատասխանատու հատվածի գիտակցությանը»,- ասաց Սամվել Հարությունյանը:
