Ազգային ժողով-կառավարություն հարցուպատասխանի ժամանակ ԱԺ «Ժառանգություն» խմբակցության ղեկավար Ռուբեն Հակոբյանը նշեց, որ պատրաստվում է մեկնել Բիշքեկ՝ մասնակցելու ԱՊՀ գագաթնաժողովին, և չգիտի` ինչ պիտի խոսի բելառուսների ու ղազախների հետ, և ստիպված է «շպիոնություն» խաղալ՝ իմանալու համար ինչ է կատարվում մեզ հետ: Հակոբյանը ԱԳ նախարար Էդվարդ Նալբանդյանից հետաքրքրվեց, թե ինչ ճակատագիր է սպասվում Մաքսային միության փաստաթղթի հրապարակմանը, երբ նրա բովանդակությունը կներկայացվի հանրությանը:
Նալբանդյանը տեղեկացրեց, որ ՀՀ նախագահն, ըստ Սահմանադրության, իրավունք ունի ստորագրել միջազգային պայմանագրեր և անհրաժեշտության դեպքում դրանք ներկայացնել ԱԺ՝ վավերացման համար։ «Միջազգային պայմանագրերը չեն հրապարակվում նախաստորագրումից առաջ: Որպես կանոն` դրանք հրապարակվում են ստորագրումից հետո»,- ասաց ԱԳ նախարարը` նկատելով, որ Մաքսային միության վերաբերյալ ՀՀ և ՌԴ նախագահների կողմից հրապարակված փաստաթուղթը միակն է, հոկտեմբերի երկրորդ կեսին սպասվում է Մաքսային միության վերաբերյալ համաժողով, որին կհաջորդի փաստաթղթերի ներկայացում ԱԺ-ին:
Նալբանդյանը նշեց, որ ՀՀ նախագահի ու ԱԳ նախարարության դիվանագիտությունը միշտ թափանցիկ է եղել. «Մենք երբևէ որևէ գաղտնիք չենք ունեցել, Հայաստանի Հանրապետությունը միշտ թափանցիկ քաղաքականություն է վարել: Մենք մշտապես հայտարարել ենք, որ պատրաստ ենք խորացնել, զարգացնել, ընդլայնել հարաբերությունները ԵՄ-ի հետ, սակայն՝ ոչ ի վնաս Ռուսաստանի հետ մեր հարաբերությունների»։
Նա նշեց, որ Հայաստանն ակտիվ մասնակցություն է ցուցաբերում տարբեր միջազգային կազմակերպություններին: Նալբանդյանի խոսքերով` Հայաստանն ունի դաշնակից հարաբերություններ Ռուսաստանի հետ, ձգտում է ամենասերտ հարաբերություններ զարգացնել բոլոր երկրների հետ: «Մենք շատ ուրախ ենք, որ մեր հարաբերությունները եվրոպական երկրների հետ շատ ավելի սերտ են։ ԱՄՆ-ի հետ մեր հարաբերությունները լուրջ հիմքերի վրա են, Չինաստանի հետ ևս սերտ հարաբերություններ ունենք, իսկ ԼՂ խնդրի կարգավորման ուղղությամբ ունենք լուրջ ըմբռնում միջազգային հանրության կողմից»,- ասաց նա` նկատելով, որ այս թեմայով վերջին հայտարարությունները համահունչ են հայկական կողմի մոտեցումներին: Մի բան, ըստ նախարարի, հստակ է՝ այն, ինչ հայտարարվել է այս տարիների ընթացքում, շարունակվում է նույն ձևով:
ԱԺ ՀՀԿ խմբակցության պատգամավոր Մարգարիտ Եսայանի դիտարկմանը, թե «արժե այս հարցում մի կողմ դնել դիվանագիտական զսպվածությունը և բառի լավ իմաստով «բացբերանություն» անել», Նալբանդյանը պատասխանեց. «ԱԳ նախարարները չպիտի բացբերանություն անեն, նրանք պետք է ուղերձ փոխանցեն, քանի որ դա լսում են ոչ միայն ներսում, այլև դրսում»:
