Ռուսաստանի դաշնային մաքսային ծառայությունը հոկտեմբերի սկզբին խորհրդակցություններ կսկսի հայ գործընկերների հետ՝ կապված Մաքսային միությանը Հայաստանի միանալու հետ: «Ազատություն» ռադիոկայանը հղում անելով «Ինտերֆաքս» լրատվական գործակալությանը հայտնում է, որ այս մասին լրագրողներին հայտնել է ծառայության պետ Անդրեյ Բելյանինովը:
«Հոկտեմբերի 3-4-ը Ռուսաստանի նախագահությամբ տեղի է ունենալու ԱՊՀ-ի անդամ երկրների մաքսային ծառայությունների ղեկավարների խորհրդակցությունը: Ես կարծում եմ, որ մենք, չսպասելով Հայաստանի կառավարության ինչ-ինչ պաշտոնական հայտարարությունների, արդեն կսկսենք գործնական բնույթի խորհրդակցություններ, հատկապես որ այնտեղ են լինելու նաև Ղազախստանի, Բելառուսի մաքսային ծառայությունների ղեկավարները»,- ասել նա:
Անդրեյ Բելյանինովը նշել է, որ համատեղ աշխատանքի արդեն շատ լուրջ գործնական փորձ կա կուտակված: «Մենք հրաշալի աշխատանքային հարաբերություններ ունենք Հայաստանի մեր գործընկերների հետ», – հայտարարել է նա՝ այնուամենայնիվ նշելով, որ մեծ աշխատանք է սպասվում մի երկրի հետ, այսինքն՝ Հայաստանի հետ, որը ընդհանուր սահման չունի Մաքսային միության անդամ երկրների հետ:
«Կարծում եմ՝ մեր հայ գործընկերների հետ համագործակցությունը կլինի 100 տոկոսով. տեղեկատվական համագործակցություն, միասնական մոտեցումներ», – ամփոփելով՝ հայտարարել է Ռուսաստանի դաշնային մաքսային ծառայության ղեկավարը:
