Հայաստանի երկու օդանավակայանում 2017 թ. առաջին չորս ամսում ուղևորահոսքի էական աճ է արձանագրվել։ Մայիսի 3-ին լրագրողների հետ հանդիպմանն այս մասին հայտնեց ՀՀ կառավարությանն առընթեր քաղաքացիական ավիացիայի գլխավոր վարչության պետ Սերգեյ Ավետիսյանը։ «2016 թ. հունվար-ապրիլ ամիսների համեմատ 2017թ. նույն ժամանակահատվածում Հայաստանի երկու օդանավակայանում ուղևորահոսքը կազմել է 668 հազար 589 մարդ կամ 28.3 տոկոս աճ»,- ընդգծեց նա:
2017 թ. առաջին չորս ամսում «Զվարթնոց» օդանավակայանում ուղևորահոսքը կազմել է 649 հազար 400 մարդ կամ 25.7 տոկոս աճ, «Շիրակ» օդանավակայանում՝ 19 հազար 189 մարդ կամ 334 տոկոս:
Նա հավելեց, որ ապրիլ ամսին ևս ուղևորահոսքի զգալի աճ է արձանագրվել նախորդ տարվա ապրիլի համեմատ: 2017 թ. Հայաստանի երկու օդանավակայանում ուղևորահոսքը կազմել է 188 հազար 391 մարդ կամ 42 տոկոս աճ: Այս տարվա ապրիլին «Զվարթնոց» օդանավակայանում ուղևորահոսքը կազմել է 183 հազար 108 մարդ կամ 38.9 տոկոս աճ, «Շիրակ» օդանավակայանում՝ 5283 մարդ կամ 745.3 տոկոս աճ:
