Վրացական News Georgia կայքի փոխանցմամբ, վրացական ընդդիմության առաջնորդներից, խորհրդարանի նախկին խոսնակ Նինո Բուրջանաձեի ամուսինը՝ սահմանապահ ոստիկանության նախկին պետ Բադրի Բիցաձեն, մեղադրվել է ոստիկանների վրա խմբակային հարձակում կազմակերպելու մեջ։ Այս մասին այսօր հայտարարել է գլխավոր դատախազի տեղակալ Դավիթ Սակվարելիձեն։
Այդ մեղադրանքը հարուցվել է պաշտոնաթող գեներալ Գիյա Ուչավայի և 5 վկաների ցուցմունքների հիման վրա։ Բացի այդ, կան նաև աուդիո և վիդեո ձայնագրություններ։
Մեղադրանքը հարուցվել է Վրաստանի Քրեական օրենսգրքի 353-րդ հոդվածի 2-րդ կետով՝ խմբի կողմից ցուցաբերված դիմադրություն, հասարակական կարգը պահպանողների և իշխանական այլ ներկայացուցիչների վրա բռնության գործադրում կամ սպառնալիք։
Այժմ Բիցաձեն մեղադրվում է զինված դիմադրության և զանգվածային անկարգությունների նախապատրաստման մեջ։ Դրա համար նրան սպառնում է 4-7 տարվա ազատազրկում։
Հիշեցնենք, որ շրջանառվող լուրերի համաձայն, մայիսի 25-ի լույս 26-ի գիշերը Թբիլիսիի կենտրոնում ընդդիմության ցույցի ցրման ժամանակ հենց Բիցաձեի ավտոմեքենան է վրաերթի ենթարկել ոստիկանին, ինչի արդյունքում նա մահացել էր։
Ի դեպ, մինչ այս էլ նշվում էր, թե Բիցաձեին ձերբակալել են Հայաստանի սահմանին, դաժան ծեծի ենթարկել ու ազատ արձակել։ Սակայն ոչինչ չէր ասվում այն մասին, թե ովքեր են նրան ձերբակալել և ինչու են հետո ազատ արձակել։
