Հայաստանի Հանրապետության Ազգային ժողովը սեպտեմբերի 10-ի նիստում քննարկեց ՀՀ կառավարության ներկայացրած՝ «Բնակչության բժշկական օգնության և սպասարկման մասին» ՀՀ օրենքում փոփոխություններ կատարելու մասին օրենքի նախագիծը: ՀՀ առողջապահության նախարար Դերենիկ Դումանյանը նշեց, որ գործող օրենսդրությունը հատվածական կարգավորումներ է տալիս, մինչդեռ անհրաժեշտ է օրենքով կարգավորում:
«Այսպիսով առաջարկվում է սահմանել պալիատիվ բուժօգնության ծառայությունը, ինչը հնարավորություն կտա սահմանել տրամադրման կարգի ձևերը. սա առավել է, քան հոսպիսները: Մենք նախատեսում ենք նաև բժշկական օգնության իրականացում՝ բացի խնամքից»,- ասաց նա:
Դումանյանը նշեց, որ ուռուցքաբանության ինստիտուտում իրենք ստեղծել են առանձին բաժանմունք: Նախարարի խոսքով՝ սա շատ լուրջ ծառայություն է, որտեղ պետք է ստեղծվեն հատուկ ենթակառուցվածքներ և պատրաստվեն հատուկ կադրեր:
«Այս ծառայությունները մեզ մոտ ձևավորված չեն եղել, հույս ունենք՝ կկարողանանք ժամանակակից պահանջներին համապատասխան աշխատել, սակայն դեռ պետք է ենթաօրենսդրական ակտեր ընդունենք»,- ասաց նա:
Դումանյանը նշեց, որ մայր օրենքում փոփոխություններ են կատարել՝ ներառելով պալիտիվ օգնության մասին օրենքը: Ըստ այդ օրենքի՝ հիվանդությունների ցանկը հաստատում է նախարարությունը: Նախարարը շեշտեց, որ այս նախագիծը վերաբերում է ոչ միայն անբուժելի, այլև ծանր և անբուժելի հիվանդներին՝ սրտի, լեյկեմիայով հիվանդներին:
«Կատարել ենք բավականին աշխատանքներ չափորոշիչների մասով և այն շարունակելու ենք: Ծանր հիվանդների համար վարկային ծրագրի շրջանակներում սկսել ենք արյունաբանական կենտրոնի կառուցման աշխատանքները, որը հագեցած կլինի նորագույն տեխնոլոգիաներով: Նախատեսել ենք նաև ոսկրածուծի պատվաստման կենտրոն, որը տարածաշրջանում իր տեսակով միակն է լինելու՝ արտերկրից եկած մասնագետների միջոցով»,- ասաց նա:
Դումանյանը հայտնեց, որ երկու տարուց կունենանք ժամանակակից բժշկական կենտրոն: Առաջին փուլում նախատեսվում են կազմակերպչական աշխատանքներ, հետագայում կլուծվեն նաև բյուջետային հարցերը:
