Այսօր առավոտյան Երևան քաղաքի ավագանու նիստին մասնակցելու ցանկություն հայտնած քաղաքացիական ակտիվիստներին այդպես էլ չեն թողել ներս մտնել: Շուրջ 15 րոպե ակտիվիստները փնտրել են ոստիկանության՝ օրվա պատասխանատուին՝ հայտնելու իրենց մտադրության մասին, և միայն ավելի ուշ պարզել են, որ օրվա պատասխանատուն Խաչիկ Ավետիսյանն է:
Քաղաքացիական ակտիվիստ Անի Կաղինյանը նշեց, որ ոստիկանները, քաղաքացիների նկատմամբ բռնություն կիրառելով, բերման են ենթարկել Կարեն Հարությունյանին, Վահագն Մինասյանին, Սուրեն Սահակյանին, Ռուզաննա Գրիգորյանին, Արսեն Օհանյանին, Հասմիկ Գրիգորյանին, Մարիին, Գոհարին և Սոնյային: Ավելին՝ ավագանու այսօրվա նիստին լրագրողներին սկզբում չեն թողել մտնել քաղաքապետարան: Ավելի ուշ քաղաքապետարանի հասարակայանության հետ կապերի բաժնի աշխատակից Արթուր Գևորգյանը լրագրողների հետ երկար վիճաբանությունից հետո թողել է նրանց մասնակցել ավագանու նիստին:
Այս պահին քաղաքացիական ակտիվիստներին դեռ պարզ չէ՝ ինչու է ոստիկանությունն իրենց բերման ենթարկել: Ի դեպ, ոստիկանությունը բռնություն է կիրառել նաև բերման ենթարկված աղջիկների նկատմամբ։ «Երևան քաղաքի յուրաքանչյուր բնակիչ իրավունք ունի մասնակցել ավագանու դռնբաց նիստերին, այնպես որ քաղաքացիները որևէ ապօրինի քայլ չեն կատարել, ավելին՝ այսօրվա նիստը քաղաքացիների ներկայացրած պահանջի հիման վրա է քննարկվելու»,- «Առաջին լրատվական»-ի հետ զրույցում ասաց Անի Կաղինյանը:
Լուսանկարը՝ Photolure-ի
