Մեծ Բրիտանիայի վարչապետ Դևիդ Քեմերոնը վերջերս գնացքով կատարած ուղևորության ընթացքում, ենթադրաբար, ուշադիր չի եղել գաղտնի փաստաթղթերով նախարարական պայուսակի նկատմամբ՝ գրում է բրիտանական Daily Mirror պարբերականը:
Պարբերականը հրապարակել է անանուն բրիտանացու՝ Լոնդոն-Էդինբուրգ գնացքում արած լուսանկարը. գնացքում գտնվել է նաև Քեմերոնը:
Լուսանկարում պատկերվել է, այսպես կոչված, կարմիր պայուսակ (red box)՝ «վարչապետ» գրությամբ:
Նման պայուսակներ, բացի կառավարության ղեկավարից, ունեն նաև նախարարները: Դրանք օգտագործվում են գաղտնի աշխատանքային փաստաթղթերը տեղափոխելու համար: Լուսանկարում երևում է, որ պայուսակը թողնված է սեղանին, ընդ որում, կողպեքի վրա՝ բանալին:
Լուսանկարի հեղինակը պատմել է, որ շրջել է՝ գնացքում իր տեղը գտնելու համար, և վագոն-ռեստորանում տեսել է վարչապետին: Անցնելով առաջ՝ նա վագոններից մեկում հայտնաբերել է վարչապետի՝ անուշադրության մատնված պայուսակը ու առանց արգելքի լուսանկարել է:
Քեմերոնը հայտնի է իր մոռացկոտությամբ:
