Չիլիում Ավգուստո Պինոչետի բռնապետության զոհերի հիշատակին կազմակերպված զանգվածային ցույցն ավարտվել է ոստիկանության հետ բախումներով, որոնք տեղի ԶԼՄ-ների տվյալներով՝ հրահրել են ցույցի ծայրահեղական տրամադրված մասնակիցները, հաղորդում է RIA Novosti-ն:
Ցույցը, որին տարբեր տվյալների համաձայն՝ մասնակցել են տասնյակ հազարավոր մարդիկ, ավարտվել է Սանտյագոյի կենտրոնական գերեզմանոցում: Ակցիայից հետո շուրջ 50 երիտասարդ բախումներ են հրահրել ոստիկանության հետ և փորձել են ներխուժել բանկերից մեկի գրասենյակ, որից հետո դյուրավառ հեղուկով շշեր են նետել դրա վրա:
Ոստիկանությունը ծայրահեղականների դեմ արցունքաբեր գազ է կիրառել:
Telesur լատինամերիկյան հեռուստաալիքը հաղորդել է, որ ոստիկանության հետ բախումների ժամանակ արցունքաբեր գազից տուժել է մի քանի լրագրող:
Բուն ցույցը, որը կազմակերպել էր «Ձերբակալվածների և անհայտ կորածների հարազատների միությունը», անցել է առանց որևէ պատահարի: Ակցիան նվիրված է եղել Չիլիում ռազմական հեղաշրջման 40 ամյակին:
