Փարիզը և Վաշինգտոնը Սիրիայի հարցում եվրոպական բոլոր պետությունների ռազմական օգնության կարիքը չունեն, սակայն նրանց քաղաքական աջակցություն է հարկավոր։ Կիրակի օրն այս մասին հայտարարել է Ֆրանսիայի ԱԳ նախարար Լորան Ֆաբիուսը՝ ԱՄՆ պետքարտուղար Ջոն Քերիի հետ հանդիպումից հետո, տեղեկացնում է РИА Новости-ն:
«Մենք այդ պետությունների նյութական, ռազմական օգնության կարիքը չունենք: Դրանցից շատերն այդ ռեսուրսները չունեն: Խոսքը քաղաքական աջակցության մասին է»,- ասել է Ֆաբիուսը:
Նախօրեին Վիլնյուսում հավաքված ԵՄ ԱԳ նախարարները կոչ էին արել Դամասկոսի մերձակայքում կիրառված քիմիական հարձակման մեղավորներին հստակ և ուժեղ պատասխան տալ:
Իր հերթին ԱՄՆ պետքարտուղար Ջոն Քերին շաբաթ օրը շնորհակալություն է հայտնել ԵՄ ԱԳ նախարարներին՝ Սիրիայի հարցում նրանց դիրքորոշման համար, և նշել է, որ աջակցություն ցուցաբերելու պատրաստ երկրների թիվը նույնիսկ ավելին է, քան ծրագրվող գործողությունների համար պահանջվում է: