Մի խումբ իրավապաշտպաններ և մտավորականներ հանդես են եկել հայտարարությամբ, որով Ռուսաստանի իշխանություններին կոչ են արել ընտրությունների ժամանակ ապահովել հավասար պայմաններ բոլոր քաղաքական ուժերի համար` վերացնելով հակասահմանադրական այն օրենքը, համաձայն որի՝ արգելվում է նոր քաղաքական կուսակցությունների գրանցումը: Այս մասին այսօր գրում է Коммерсант-ը:
Այդ հայտարարության տակ ստորագրել են իրավապաշտպաններ Սերգեյ Կովալյովը, Յուրի Ռիժովը, կինոռեժիսոր Էլդար Ռյազանովը, դերասաններ Օլեգ Բասիլաշվլին և Լիա Ախեջակովան: Նշվում է, որ այս հայտարարությունը կարող է սկիզբ դառնալ հանուն արդար և ժողովրդավարական ընտրությունների անցկացման ճակատ ստեղծելու համար:
Բացի վերոհիշյալներից, այս թղթի տակ ստորագրել են գրող Վլադիմիր Վոյնիչը, դերասանուհի Նատալյա Ֆատեևան, գործարար Եվգենի Զիմինը, տնտեսագիտության բարձրագույն դպրոցի ղեկավար Եվգենի Յասինը և այլք:
«Ե՛վ Դմիտրի Մեդվեդևի նախագահության կաթվածահար վիճակը, և՛ խորհրդարանի անգործունակությունը, և՛ մարզային ու մունիցիպալ իշխանությունների անօգնականությունը, այս ամենը վառ վկայությունն են այն բանի, որ Ռուսաստանում զարգանում է քաղաքական ճգնաժամ»,- ասված է հայտարարության մեջ:
Նրանք իշխանություններին կոչ են արել «լիովին ապահովել քաղաքացիների սահմանադրական իրավունքները և վեր հանել նրանց իրական քաղաքական նախընտրությունները Պետդումայի և նախագահական ազատ և արդար ընտրությունները ժամանակ»:
«Իշխանության վակուումի և նրա աղետալի հետևանքների ողջ պատասխանատվությունը կընկնի նախագահ Մեդվեդևի և «Եդինայա Ռոսիա» կուսակցության ղեկավար Վլադիմիր Պուտինի վրա»,- եզրափակել են նրանք: