Շաբաթ օրն ԱՄՆ-ի խոշոր քաղաքներում՝ Նյու Յորքում, Վաշինգտոնում, Ինդիանապոլիսում, Չիկագոյում և Բոստոնում բողոքի ակցիաներ են տեղի ունեցել՝ ընդդեմ ԱՄՆ նախագահ Բարաք Օբամայի՝ Սիրիայի ղեկավար Բաշար Ասադի կառավարությունը ռազմական գործողություններով պատժելու դեմ։
Քաղաքացիների զգալի մեծամասնությունը համաձայն չէ Սիրիայի ներքին հակամարտությանը ռազմական միջամտության գաղափարի հետ: Դա են ցույց տալիս հանրային կարծիքի հարցումները:
Շաբաթ օրը միանգամից մի քանի հանրահավաք է տեղի ունեցել Նյու Յորքում: Քաղաքացիները փողոց են դուրս եկել «Ո՛չ Սիրիայի հետ պատերազմին», «Կրճատե՛ք Պենտագոնը, ոչ թե նպաստները» կարգախոսներով, հաղորդում է Ria Novosti-ն:
Սիրիական ծագում ունեցող ամերիկացիներն արդեն 2 շաբաթ Նյու Յորքում տեղի ունեցող հակապատերազմական ցույցերի ամենաակտիվ մասնակիցներն են։
Նրանց շարքերում համաձայնություն չկա այն հարցի շուրջ, թե երկու կողմերից որն է մեղավոր արյունահեղության մեջ: Սակայն բոլորն էլ պնդում են, որ այս հարցի վերաբերյալ Սպիտակ տնից դիվանագիտական, ոչ թե ուժային լուծումների են սպասում:
