Նախքան Մաքսային միությանն անդամակցելու որոշում կայացնելը Հայաստանը պիտի լուծեր Վրաստանի հետ սահմանային անցակետերում հերթերի գոյացման հարցը: «Առաջին լրատվական»-ի հետ զրույցում այս մասին նշեց Վրաստանի խորհրդարանի հայ պատգամավոր Հենզել Մգոյանը: «Ես կցանկանայի, որ Ջավախքի ժողովրդի համար այսօր մարդկանց հերթեր չլինեին Հայաստանի մաքսատան առաջ. իբրև պատգամավոր` շատ եմ լսում, որ մարդիկ բողոքում են: Նրանք անձամբ ինձ էլ են դիմել այդ խնդրով, որ Հայաստանի մաքսատան առաջ ժամերով հերթ են կանգնում, սպասում` մինչև թղթաբանությունը լուծվի: Լավ կլիներ` նախ այդ հարցը լուծվեր, հետո նոր անդրադառնային Մաքսային միության այդ հարցին»,- ասաց նա: Մգոյանի խոսքերով` իրենք քանիցս Հայաստանի կառավարությանը խնդրել են այդ հարցը վերջնականապես լուծել, քանի որ մարդիկ ուշանում են` ինքնաթիռից, վիրահատությունից, ուշանում են ոչ իրենց մեղքով: Դա մարդկանց վրդովմունքն է առաջացնում:
Հայազգի պատգամավորը դժվարացավ նշել` Մաքսային միությանն անդամագրված Հայաստանի հետ Վրաստանի հարաբերություններն ինչպես կզարգանան, նա նշեց, որ ժողովուրդը ևս դեռ այդ հարցին պատրաստ չէ: «Ամբողջ Թիֆլիսում, Բաթումում հյուրանոցների 90 տոկոսը զբաղված են, ընդ որում` բոլոր հանգստացողները Ռուսաստանից են եկել: Հիմա ռուսները շատ են գալիս այստեղ՝ հանգստանալու, այնպես որ, կարծում եմ` ռուս-վրացական հարաբերություններն աստիճանաբար ջերմանում են»,- եզրափակեց նա:
Հայաստանի և Ռուսաստանի նախագահների` սեպտեմբերի 3-ին Մոսկվայում կայացած երկկողմ հանդիպման ժամանակ ՀՀ նախագահ Սերժ Սարգսյանը հայտարարել է, որ Հայաստանը պատրաստվում է անդամակցել Մաքսային միությանը և հետագայում մասնակցել Եվրասիական տնտեսական միության ձևավորմանը: Ռուսաստանի նախագահ Վլադիրմիր Պուտինը հավանություն է տվել այդ որոշմանը և պատրաստակամություն հայտնել աջակցել այդ գործընթացին:
«Հայաստանի Հանրապետության նախագահ Սերժ Սարգսյանը հայտարարել է, որ իր երկիրը ցանկանում է անդամակցել Մաքսային միությանը և այդ նպատակի համար կիրառել անհրաժեշտ գործնական քայլեր, իսկ հետագայում՝ մասնակցել Եվրասիական տնտեսական միության ձևավորմանը»,- ասվում է երկու երկրների նախագահների համատեղ հայտարարության տեքստում: