Արգենտինան առաջարկել է Սիրիա հումանիտար առաքելություն ուղարկել, որը պետք է կազմված լինի ՄԱԿ ԱԽ-ի անդամ-երկրների ԱԳ նախարարներից: Այս մասին տեղեկացնում են տեղական ԶԼՄ-ները՝ հղում կատարելով G20-ի գագաթնաժողովի ավարտին լրագրողների առջև նախագահ Քիստինա Ֆերնանդես դե Քիրշների արած հայտարարությանը, փոխանցում է РИА Новости-ն:
Նա նշել է, որ առաքելության հիմնական խնդիրը պետք է այս երկրում կրակի դադարեցման ապահովումը դառնա: Նրա խոսքերով՝ հարկավոր է կրկին անգամ փորձել այս խնդիրը դիվանագիտական ճանապարհներով լուծել: Արգենտինայի նախագահը նշել է, որ գագաթնաժողովին մասնակցող պետությունների մեծամասությունը դեմ է սիրիական հակամարտությանը զինված միջամտելուն:
Նրա խոսքերով՝ գագաթնաժողովի բոլոր մասնակիցներն ընդգծել են խնդրին բազմակողմանի մոտեցման և ՄԱԿ-ին հիմնական դերը հանձնելու անհրաժեշտությունը: Բացառությամբ մի քանի կարծիքների՝ հիմնական մասը կողմ է Սիրիայի հակամարտությանը չմիջամտելուն, ասել է նախագահը:
