«Փարպի համայնքում ամեն ինչ լավ է, ժողովուրդը հանգիստ է, էդ հարցն էլ փակվել է»,- «Առաջին լրատվական»-ի հետ զրույցում ասաց Փարպիի համայնքապետ Իշխան Առաքելյանը:
Հիշեցնենք, որ ապրիլի 2-ին ՀՅԴ-ի կողմից Կենտրոնական ընտրական հանձնաժողով դիմում-բողոք էր ներկայացվել Արագածոտնի մարզի Փարպի համայնքում ընտրախախտումների վերաբերյալ: Դիմումը վերահասցեագրվել էր տարածքային ընտրական հանձնաժողով, որը, քննելով դիմումը, անվավեր էր ճանաչել Արագածոտնի մարզի Փարպի համայնքի թիվ 17/21 ընտրական տեղամասում քվեարկության արդյունքները, իսկ վարույթով ձեռք բերված նյութերն ուղարկվել էին դատախազություն: Դատախազությունը քրեական գործ է հարուցել, քանի որ արձանագրել էր, որ ընտրատեղամասում առկա են եղել բազմաթիվ ընտրողներ, բաց քվեարկություններ ու ընտրողների կամքի ազատ արտահայտման նկատմամբ վերահսկողություն:
Փարպիի համայնքապետը նախօրեին մեզ հետ զրույցում ասել էր, որ գյուղը ոտքի է կանգնելու, եթե այս քրեական գործի շրջանակներում հանձնաժողովի որևէ անդամ դատվի: Գյուղապետը նաև նշել էր, որ հիմնական խառնաշփոթը ընտրության օրն առաջացել է այն պատճառով, որ մարդիկ չեն տիրապետել քվեարկության կարգին: «Մեկը մյուսից հարցրել է, թե ոնց քվեարկի, ինչ անի, կամ ընտանիքով եկել են, ընտանիքի մի անդամը մյուսին օգնել է քվեարկել, դրա մեջ ի՞նչ վատ բան կա»,- ասել էր Առաքելյանը:
Այսօր, սակայն, գյուղապետը հորդորեց հանգիստ թողնել այս թեման, մոռանալ իրենց գյուղը և այդ պատմությունները: «Հարցը լուծվել է, խնդրում եմ՝ մեզ մոռացեք: Հիմա դատարան կտան, ինչ կանեն՝ մեզ չի հետաքրքրում: Ժողովուրդը հանգիստ իր գործին է անցել: Ժողովրդին չի հետաքրքրում էդ հարցը: Մեր գյուղին հանգիստ թողեք, մեզ մեր հոգսերը հերիք են»,- ասաց Առաքելյանը:
Գյուղապետին հիշեցրինք, որ ինքն ասել էր՝ եթե ինչ-որ մեկը դատվի, իրենք ամբողջ գյուղով ոտքի կկանգնեն, արձագանքեց. «Այո, ասել եմ, բայց դա ժողովուրդն է որոշում: Եթե ժողովուրդը կուզի, թող ուզի, չէ՝ ոչ մի բան էլ չի լինի: Կրկնում եմ՝ մեզ հանգիստ թողեք, հարցը փակված է»:
Ինչ վերաբերում է քրեական գործին, ապա այս գործով դեռ քննություն է գնում:
Նշենք, որ Փարպի համայնքում ծագած այս խնդիրը ավելի խոր արմատներ ունի: Դեռ քարոզարշավը չսկսած՝ ՀՅԴ-ն տեղեկություն տարածեց, որ Արագածոտնի մարզում ՀՀԿ ռեյտինգային ցուցակով առաջադրված Բազմասեր Առաքելյանը ծեծի էր ենթարկել Փարպի գյուղի մի բնակչի, ով հայտարարել էր, որ ընտրելու է ՀՅԴ-ին:
Բազմասեր Առաքելյանը հերքել էր այդ տեղեկությունը: Այնուհետև այդ հեռակա լարվածությունը տեղափոխվեց նաև ընտրատեղամաս, և հենց ՀՅԴ-ն էլ դիմում ներկայացրեց ԿԸՀ՝ անվավեր ճանաչելու Փարպիի տեղամասերից մեկի քվեարկության արդյունքները:
