«Ազատագրենք հուշարձանն օլիգարխից» նախաձեռնությունը «Դեմ ենք օլիգարխի կողմից հուշարձանի քանդմանը» պահանջով այսօր երթ և բողոքի ակցիա անցկացրեց մշակույթի նախարարության, քաղաքապետարանի, այնուհետև «Փակ շուկայի» մոտ: Ակցիայի մասնակիցները պահանջում են, որպեսզի գործարար Սամվել Ալեքսանյանը չքանդի պատմամշակութային արժեք ներկայացնող «Փակ շուկան» և դրա փոխարեն «Երևան սիթի» սուպերմարկետ չկառուցի: Ակտիվիստ Գևորգ Սաֆարյանը նշեց, որ «Փակ շուկայի» քանդումը վանդալիզմ է, և դրա համար պատասխանատուները պետք է պատժվեն օրենքի ողջ խստությամբ:
Նշենք, որ «Փակ շուկայի» մոտ բողոքի ակցիայի մասնակիցներին դիմավորեց ՀՀԿ տատիկը, իսկ դիմացի փողոցում՝ հենց «Փակ շուկայի» դիմաց հավաքված են մի խումբ մարդիկ, ովքեր ենթադրվում է, որ Սամվել Ալեքսանյանի պաշտպաններն են: ՀՀԿ տատիկը դժգոհեց ամեն ինչից, հորդորեց ակտիվիստներին թույլ չտալ ելույթ ունենալ, բացականչեց «փառք ու պատիվ Սերժ Սարգսյանին», ապա բղավեց, որ «Ժառանգությունը» պետք է լուծարվի: Ակտիվիստները նրան արհամարհում են և շարունակում են ներկայացնել իրենց պահանջները: Հավանաբար բախումներից խուսափելու համար նրանք չեն անցնում փողոցը:
Լուսանկարները` PanARMENIAN Photo-ի
