«Պետության համար նվաստացուցիչ էր ոչ թե այն, թե ինչ է պատահել, այլ այն թե ինչպես է պատահել: Ես կարդացի Սերժ Սարգսյանի հայտարարությունը, որն արվեց Մոսկվա կատարած այցի ընթացքում»,- «Առաջին լրատվական»-ի հետ զրույցում ասաց «Զերկալո» ադրբեջանական թերթի քաղաքական մեկնաբան Ռաուֆ Միրկադիրովը՝ անդրադառնալով Մոսկվայում Սերժ Սարգսյանի կատարած հայտարարությանը:
«Մեկ տարի շարունակ վարչապետը, ՀՀԿ խմբակցության ղեկավար Գալուստ Սահակյանն այլ բան են հայտարարում՝ առ այն, որ Հայաստանը չի կարող անդամակցել Մաքսային միությանը որովհետև ընդհանուր սահման չկա, և որ բանակցությունները Եվրոպական միության հետ են՝ Ասոցացման համաձայնագիր կնքելու առումով (ներառյալ ԽՀԱԱՊ-ը), հետո հանկարծ լսում են, որ Հայաստանի նախագահը հայտարարում է, թե մենք հաստատում ենք Մաքսային միությանը մեր անդամակցելու ցանկությունը: Տպավորությունն այնպիսին է, որ միշտ նման ցանկություն եղել է, հիմա էլ հաստատում են: Բայց եթե մեկ տարվա ընթացքում հայտարարում ես մեկ բան, հետո էլ վերահաստատում մեկ այլ ցանկություն, տպավորություն է ստեղծվում, թե դու ազգին խաբել ես՝ բացեիբաց ուրիշ բան ես խոսում, կուլիսներում այլ բան հայտարարում»:
Նրա խոսքերով նվաստացուցիչ էր այս ամենի բովանդակությունը, քանզի ՌԴ նախագահ Վլադմիր Պուտինը հայտարարեց, թե ողջունում ենք ձեր ցանկությունը, ինչն էլ նշանակում է՝ մենք ձեզ կօգնենք, որ անդամագրվեք, մենք ձեզ չենք հրավիրել՝ դուք խնդրեցիք, մենք կընդառաջենք. «Հենց այդ ձևաչափն ինքնին վիրավորական է Հայաստանի համար, ըստ իս՝ այս հայտարարությունից հետո վարչապետը գոնե պետք է հրաժարական տար:
Ես կիսով չափ համամիտ եմ Սերգեյ Մինասյանի այն տեսակետի հետ, որ Սերժ Սարգսյանն ընտրության այլ հնարավորություն չի ունեցել: Պետք չէ մտածել, թե ինչ վատն է Սերժ Սարգսյանը, ինչ թույլ նախագահ է, այլ պետք է հաշվի առնել, թե ինչպիսի քաղաքականությունն է դրան բերել»:
Պատասխանելով այն հարցերին, թե արդյո՞ք այս որոշմամբ Ռուսաստանը Ղարաբաղի անվտանգությունն իր վրա կվերցնի, և ունի՞ արդյոք նա այդ հնարավորությունը, մեր զրուցակիցն ասաց. «Պուտինի նպատակը Ղարաբաղը և Հայաստանը պաշտպանելը չէ, Երևանը ինքն է ապացուցել, որ Ղարաբաղն ուժեղ գործոն է այս խաղում: Կարծում եմ՝ խոսակցությունը շատ առարկայական է եղել: Ուղղակի ասել են, որ չհամաձայնելու դեպքում ինչ-որ բան կպատահի Ղարաբաղում, իսկ իրենք կփակեն աչքերը այն ամենի վրա, ինչ Ադրբեջանը կանի, բայց վերջին պահին կգան, կփրկեն Ղարաբաղն ու Հայաստանը: Սա ուղղակի շանտաժ է եղել, բայց Հայաստանը հնարավորություն չունի ստուգելու՝ դա պարզապես շանտա՞ժ է եղել, թե՞ լուրջ խոսակցություն, այսինքն Սերժ Սարգսյանն այլ հնարավորություն չի ունեցել:
Ռուսաստանը չի պահի Ղարաբաղի անվտանգությունը, նա պարզապես կպահի այդ շանտաժը, այդ տարբերակը աշխատեց հիմա: Ասում են՝ կկորցնես ամեն ինչ, ոչ միայն Ղարաբաղը այլ նաև իշխանությունը, հնարավոր է՝ հայտնվես բանտում:
Հայաստանն, առհասարակ, ավելի շատ կախում ունի Ռուսաստանից քան Ադրբեջանը: Հասկանում եք, Ադրբեջանն ունի ռեսուրս, նա կարող էր զենքը գնել ոչ միայն Ռուսաստանից, այլև ուրիշ պետությունից: Իսկ ինչ վերաբերում է այն հանգամանքին, որ արդեն իսկ գնել է, ապա ինչքան գիտեմ՝ զենքի վաճառքի վերաբերյալ բանակցություններն ավելի վաղ էին սկսվել, քան Հայաստանի և ԵՄ-ի Ասոցացման պայմանագիր կնքելու բանակցությունները»:
Ամփոփելով իր միտքը՝ ՌաուՖ Միրկադիրովը նշեց, որ այս ամենը կարելի է որակել որպես ռեալ ձախողում. «Կարծես կանչել Մոսկվա և ասել էին՝ մեկ ժամից ելույթ կունենաս, նույնիսկ չէին թողել այդ հարցը խորհրդարանում քննարկվի, Հայաստանում նիստ անցկացվի:
Իսկ առհասարակ, մինչև վիլնյուսյան գագաթնաժողովը դեռ երկու ամիս կա՝ ոչինչ չի կարելի բացառել։ Եթե ասում է, որ հաստատում է Մաքսային միությանն անդամգրվելու Հայաստանի ցանկությունը, ապա շատ հանգիստ կարող է կանգնել և հայտարարել, որ ես նման բան առհասարակ չեմ ասել, սխալ է ընկալվել իմ խոսքը»: